• Yaratildi: 29.08.2021
• Yangilandi: 07.09.2021
• O'qildi: 2561

Kombinat ishchi-xodimlari munosib taqdirlandi

29 avgust kuni “NKMK tarixi” muzeyida mamlakatimiz mustaqilligining 30 yilligi munosabati bilan bir guruh Navoiy kon-metallurgiya kombinati ishchi-xodimlariga “O‘zbekiston Respublikasi mustaqilligining 30 yilligi” esdalik nishonlarini topshirish marosimi bo‘lib o‘tdi.

Tantanali marosimda Navoiy kon-metallurgiya kombinati bosh direktori Q.Sanaqulov barchani eng aziz, eng ulug‘ bayram – Vatanimiz mustaqilligining o‘ttiz yilligi bilan samimiy muborakbod etdi.

Tadbirda davlatimiz rahbarining 2021 yil 25 avgustdagi “O‘zbekiston Respublikasi mustaqilligining o‘ttiz yilligi munosabati bilan davlat xizmatchilari hamda ishlab chiqarish va ijtimoiy-iqtisodiy sohalar xodimlaridan bir guruhini mukofotlash to‘g‘risida”gi Farmoniga muvofiq, kombinatning 6 nafar vakili davlatimizning yuksak davlat mukofotlari – faxriy unvon, orden va medallariga sazovor bo‘lishgani alohida eʼtirof etildi.

- Bugungi kunda mamlakatimiz iqtisodiyotini rivojlantirishda, albatta, Navoiy kon-metallurgiya kombinati, shu jumladan, Navoiy mashinasozlik zavodining o‘rni beqiyos. Keyingi yillarda zavodimizda mahalliylashtirish dasturi asosida keng ko‘lamli ishlar amalga oshirilmoqda. Yana bir muhim maʼlumotni aytib o‘tsam. Ilgari, ishlab chiqarish korxonasi qurilsa, oddiy boltigacha chetdan olib kelinardi. Bu borada ham olib borilgan tinimsiz mehnat tufayli endilikda ularni  zavodimizda ishlab chiqarishni yo‘lga qo‘yishdi. Hozirda nafaqat oddiy boltlar, balki juda qimmat narxda turadigan sharli tegirmonlargacha Navoiy mashinasozlik zavodida tayyorlanmoqda, - deydi “O‘zbekiston Respublikasida xizmat ko‘rsatgan sanoat xodimi”, zavod direktori O‘ktam Rahmatov.

Shuningdek, tadbirda bir guruh korxona ishchi-xodimlariga “O‘zbekiston Respublikasi mustaqilligining 30 yilligi” esdalik nishoni hamda turli darajadagi “Konchilik shuhrati” ko‘krak nishonlari tantanali ravishda topshirildi.

NKMK Matbuot markazi.