• Yaratildi: 11.09.2021
• Yangilandi: 13.09.2021
• O'qildi: 3172

Yangi kitoblar taqdimoti bo‘lib o‘tdi

Navoiy shahridagi “Farhod” madaniyat saroyida O‘zbekiston Respublikasi davlat mustaqilligining 30 yilligi munosabati bilan “Navoiy viloyatidan mustaqilligimizning 30 yilligiga 30 ta kitob” loyihasi doirasida kitoblar taqdimoti o‘tkazildi.

Marosimda viloyat faollari, NKMK, keng jamoatchilik, yoshlar  vakillari, yozuvchi-shoirlar, noshirlar va jurnalistlar ishtirok etdilar.

Unda so‘z olgan Navoiy viloyati hokimi Q.Tursunov, Navoiy kon-metallurgiya kombinati bosh direktori Q.Sanaqulov va boshqalar mustaqillik bergan imkoniyatlar, Yangi O‘zbekistondagi o‘zgarishlar, kitobning inson hayotidagi ahamiyati, yangi kitoblar haqida o‘z fikr-mulohazalarini bildirdilar.

Ushbu marosimda kombinatning “Yangilanayotgan O‘zbekiston: Navoiy kon-metallurgiya kombinatining yangi tarixi” kitobi va “NKMK: yuksalish dovonlari” kitob-albomi tadbir ishtirokchilarida juda katta qiziqish uyg‘otdi.

Kombinat o‘zining 63 yillik faoliyat yo‘li, tarixiga ega. Kombinat tarixi, uning ajoyib mutaxassislari to‘g‘risida ko‘plab kitoblar yozilgan. Shulardan biri, 2002 yilda nashr etilgan “Navoiyskiy gorno-metallurgicheskiy kombinat” nomli kitobidir. “Yangilanayotgan O‘zbekiston: Navoiy kon-metallurgiya kombinatining yangi tarixi” kitobi esa uning mantiqiy davomidir. Bu kitobda kombinat jamoasining keyingi yillarda amalga oshirilayotgan keng ko‘lamli islohotlari keng yoritildi. Xuddi shunday “NKMK: yuksalish dovonlari” kitob-albomida ham Yangi O‘zbekiston davrida barpo etilgan yangi zavodlar, ularda mehnat qilayotgan yoshlarimiz faoliyati aks ettirildi.

Taʼkidlash joizki, keyingi yillarda kombinatda mehnat qilayotgan turli kasb egalarining 20 ga yaqin kitobi nashr etildi. “Yangi istiqbollar sari”, “Kengliklar sururi”, “Uyg‘oq xotiralar”, “Buyuk ixtirolarning sehrli olami”, “Vaqt-umuminsoniy qadriyat”, “Umr dovonlari”, “Hayot chorrahalarida” va boshqa kitoblar bunga misol bo‘la oladi.

Yangi 30 ta kitobni tayyorlash va nashr etishga munosib hissasini qo‘shgan bir guruh mutaxassislar va ijodkorlar viloyat hokimligining Tashakkurnomasi hamda qimmatbaho sovg‘alari bilan taqdirlanishdi. Ular orasida Navoiy kon-metallurgiya kombinati bosh direktori maslahatchisi Xolmamat Raupov, “Konchilar hayoti” gazetasi muharriri Nizomiddin Sadriddinov va tahririyat muhandisi Azamat Zaripovlar borligi quvonarli holdir.

Tadbirda “Farhod” madaniyat saroyi sanʼatkorlari tomonidan ijro etilgan kuy-qo‘shiqlar davraga yanada fayz kiritdi.

NKMK Matbuot markazi.