• Yaratildi: 02.11.2021
• Yangilandi: 03.11.2021
• O'qildi: 3573

Navoiy shahrida Prezident maktabi ochildi

Navoiy shahrida qad rostlagan nufuzli o‘quv dargohini zamonaviy bunyodkorlik ishlarining yorqin namunasi, deyish mumkin. Binoning o‘ziga xos zamonaviy ko‘rinishi inson qalbiga havas va hayrat bag‘ishlaydi. 2-noyabr kuni mazkur maktabning rasmiy ochilish marosimi bo‘lib o‘tdi.

Tadbirda Prezident taʼlim muassasalari agentligi direktori H.Umarova, viloyat hokimi Q.Tursunov, NKMK bosh direktori, senator Q.Sanaqulov, shuningdek, ota-onalar chiqish qilib, farzandlarimiz zamonaviy taʼlim olishi uchun ulkan imkoniyatlarni yaratib berayotgan Yurtboshimizga o‘z minnatdorliklarini bildirdilar.

Maktab barcha qulayliklarga ega, jumladan, 168 nafar o‘quvchi va 15 nafar o‘qituvchiga mo‘ljallangan yotoqxona, o‘quv zallari, besh mahal ovqatlantirishga mo‘ljallangan oshxona, qishki va yozgi sport zallari, suzish havzalari, anjumanlar zaliga ega. Fan va o‘quv xonalari elektron doskalar, zaruriy o‘quv jihozlari bilan taʼminlangan. Bir so‘z bilan aytganda, o‘quvchining zamonaviy bilim olishi uchun barcha imkoniyatlar mavjud.

Yana shuni alohida taʼkidlash joizki, maktabga kelgusida rivojlangan xorijiy davlatlardan 13 nafar xalqaro toifadagi ilg‘or o‘qituvchilar ishga qabul qilinishi belgilangan. Ayni paytda esa 4 nafar xorijlik o‘qituvchilar mahalliy o‘qituvchilar bilan bir safda o‘z faoliyatlarini boshlab yuborishgan.

Tadbir davomida Prezident maktabi o‘quvchisi, degan ulkan baxtga erishgan 144 nafar o‘g‘il-qizlar tantanali qasamyod qabul qilishdi.

Shundan so‘ng ishtirokchilar maktabda yaratilgan keng sharoitlar bilan yaqindan tanishdilar.

NKMK Matbuot markazi.