• Yaratildi: 08.11.2021
• Yangilandi: 08.11.2021
• O'qildi: 554

Qadimiy shaharga sayohat

Joriy yilning 6-noyabr kuni Navoiy kon-metallurgiya kombinati Oila va xotin-qizlarni qo‘llab-quvvatlash Kengashi tashabbusi hamda NKMK maʼmuriyati va kasaba uyushmasi Kengashining amaliy yordami bilan Navoiy mashinasozlik zavodi, “1-GMZ” kon boshqarmasi, Geologiya-qidiruv ekspeditsiyasi, Zarafshon qurilish boshqarmasi “Sanoatmontaj” montaj-qurilish tresti, “Navoiy” qurilish-montaj boshqarmasi va kombinat boshqarmasida mehnat qilayotgan 45 nafar xotin-qizlarning Buxoro shahriga sayohati uyushtirildi.  

Sayohatimiz davomida Buxorodagi yetti pirlardan hisoblanmish G‘ijduvon tumanida joylashgan Xo‘ja Abdulxoliq G‘ijduvoniy, Buxoro viloyatining Suxor qishlog‘ida tavallud topgan Sayyid Amir Kulol hamda islom dini rivojiga beqiyos hissa qo‘shgan Bahouddin Naqshband tabarruk maqbaralarini ziyorat qildik.

So‘ngra ko‘hna Buxoroning tarixiy qadamjolari bilan yaqindan tanishish maqsadida Labi Hovuz, “Poyi kalon” ansambllari va Toqi Zargaron, Toqi sarrafon, Toqi telpakfurushon, Buxoro savdo majmualariga va Arkka tashrif buyurdik.

Qadimiy va ko‘rkam yodgorliklardan biri, X asrda qurilgan Ismoil Somoniy maqbarasi, maydoni qariyb 4 gektar, “shahar ichida shahar” deb atalgan, yuz yillar davomida Buxoro hukmdorlarining rasmiy qarorgohi bo‘lgan Ark qalʼasi,  Buxoro ahli va mehmonlarining sevimli joyiga aylangan Labi Hovuz va uning atrofida barpo etilgan Ko‘kaldosh, Nodir Devonbegi madrasalari sayohat ishtirokchilarida unutilmas taassurotlar uyg‘otdi.

Bugungi kunda mamlakatimizda milliy qadriyatlarni rivojlantirish, madaniy merosni, ayniqsa, tarixiy-meʼmoriy obidalarni asrash, ularni kelgusi nasllarga yetkazish borasida amalga oshirilayotgan ulkan ishlarni ko‘rib, shunday yurtda yashab, mehnat qilayotganimizdan faxrlandik.

Sabohat NAZAROVA,

NKMK Oila va xotin-qizlarni

qo‘llab-quvvatlash Kengashi raisi.