• Yaratildi: 10.05.2022
• Yangilandi: 10.05.2022
• O'qildi: 2612

Navoiy shahrida gandbol zali foydalanishga topshirildi

7-may kuni Navoiy shahrida zamonaviy sport inshooti – gandbol zali foydalanishga topshirildi.

Tadbirda taʼkidlanganidek, so‘nggi yillarda mamlakatimizda sport sohasini rivojlantirish, iqtidorli sportchilarni tanlash va tarbiyalash, ularni munosib rag‘batlantirish yo‘lida katta ishlar amalga oshirilmoqda. “NKMK” AJ tomonidan doimo sportni rivojlantirish, yoshlar orzularini ro‘yobga chiqarishni qo‘llab-quvvatlashga alohida eʼtibor qaratilib kelinmoqda.
 

Kombinat va Kasaba uyushmalari Kengashi mablag‘lari hisobidan amalga oshirilgan qurilish ishlari o‘tgan yilning iyun oyida boshlangan edi. Mazkur gandbol zalining qurilish ishlari Zarafshon qurilish boshqarmasining “Navoiy” qurilish-montaj boshqarmasi, Sanoat elektrmontaj tresti, Navoiy mashinasozlik zavodi, Taxiatosh metallkonstruksiyalar zavodi, “NKMK jamg‘armasi” DMning Ijtimoiy obyektlar boshqarmasi vakillari tomonidan amalga oshirildi.

Taʼkidlash joizki, gandbolchilarimiz respublika, xalqaro va jahon arenalarida ko‘plab yutuqlarni qo‘lga kiritmoqda. Jumladan, yaqinda Olmaota shahrida  gandbol bo‘yicha 18 yoshgacha bo‘lgan qizlar o‘rtasida bo‘lib o‘tgan Osiyo chempionatida O‘zbekiston terma jamoasi musobaqaning shohsupasiga ko‘tarildi. Yakuniy sarhisobga ko‘ra, terma jamoamiz Makedoniyaning Skopiya shahrida bo‘lib o‘tadigan Jahon chempionatiga yo‘llanmani qo‘lga kiritdi. Ular orasida Navoiy shahridagi “So‘g‘diyona” jismoniy tarbiya va sport klubi tarbiyalanuvchilari – Ruxshona Ro‘ziyeva va Nasiba To‘xtayevalar ham borligi quvonarlidir.

Shuning bilan birga, 2016-yildan buyon 11 nafar yosh gandbolchilar erishgan yutuqlari uchun oliy o‘quv yurtlariga imtiyozli kirish huquqini qo‘lga kiritdi.

Tadbirda “NKMK” AJ Boshqaruv raisi – Bosh direktori Q.Sanaqulov, O‘zbekiston gandbol federatsiyasi bosh kotibi I.Matxalikov, sport ustaligiga nomzod O.Ahadovalar so‘zga chiqishdi. 

“NKMK” AJ matbuot xizmati.