• Yaratildi: 15.06.2022
• Yangilandi: 15.06.2022
• O'qildi: 1146

Yosh ishchi-xodimlarning ishdan bo‘sh vaqti mazmunli o‘tkazildi

Mamlakatimizda yoshlarga taʼlim olish, kasb-hunar o‘rganish uchun zamonaviy sharoit va imkoniyatlar yaratilgan. Shu bilan birga, yoshlarning bo‘sh vaqtini mazmunli o‘tkazishni tashkil etish dolzarb masala hisoblanadi.

“NKMK” AJ tomonidan 2022-yilda “Yoshlarga oid davlat siyosatini” amalga oshirish yuzasidan tasdiqlangan chora-tadbirlar dasturi va “Yoshlar maʼnaviyatini rivojlantirish bo‘yicha 5 ta muhim tashabbus”da belgilangan yo‘nalishlarning ijrosini taʼminlash maqsadida, Markaziy kon boshqarmasi Yoshlari yetakchilari kengashi tomonidan “Auminzo-Amantoy” konida joriy yilning 13-iyun kuni “Yoshlar oyligi” doirasida tadbir tashkil etildi.

Mazkur tadbir doirasida yoshlar o‘rtasida sog‘lom turmush tarzini targ‘ib etish va ularning kitobga bo‘lgan qiziqishlarini yanada oshirish maqsadida, sport musobaqalari hamda kitobxonlik aksiyasi o‘tkazildi. Kon ishchi-xodimlari va yoshlar arqon tortish, tosh ko‘tarish, uzunlikka sakrash va to‘p uloqtirishda o‘zaro bellashdilar. G‘olib va sovrindorlarga esdalik sovg‘alar topshirildi.

Kitobxonlik aksiyasida “Auminzo-Amantoy” konida joylashgan ishchilar shaharchasida tashkil etilgan kutubxonaga yoshlar, ishchi-hodimlar va kon maʼmuriyati tomonidan 300 tadan ziyod turli janrdagi kitoblar sovg‘a qilindi. Ushbu kutubxona 1,2 mingtadan ortiq kitob fondiga ega bo‘ldi. Bunday tadbirlar yoshlarning kitobga bo‘lgan qiziqishlarini oshirib, ularni jismonan sog‘lom bo‘lishlariga undaydi.  

“NKMK” AJ MKB Axborot xizmati.