Система Orphus

Shriftning o'lchamini

Qarama-qarshilik

        
Siz bu yerdasiz: Bosh sahifa Rahbariyat Rahbariyatning rasmiy bayonotlari AYOL BORKI, OLAM MUNAVVAR!

AYOL BORKI, OLAM MUNAVVAR!

Aziz va muhtarama opa-singillar!

Qadrli hamkasblar!

 

Yurtimizga kirib kelgan ushbu go‘zal bahor kunlarida kombinatimizda mehnat qilayotgan barcha opa-singillarimiz va dilbar qizlarimizni 8 mart – Xalqaro xotin-qizlar bayrami bilan chin qalbimdan muborakbod etaman.

Ayol – nafislik va go‘zallik ramzi. Ayol – vafo va sadoqat timsoli. Hayotimizning fayzi va ko‘rki bo‘lgan ayollarimiz tufayli turmushimiz go‘zal va mazmunli, xonadonlarimiz obod va nurafshondir. Mo‘’tabar onalar va  ayollarimizning yaratuvchanligi, aql-zakovati va fidoyiligi bilan asrlar mobaynida yer yuzida hayot davom etmoqda. Zero, oilani jipslashtiradigan, unga fayzu-barokat kiritadigan, xonadonlarimizni mehr-muhabbat, nafosat, ezgulik nuri bilan munavvar qiladigan mo‘’tabar onalarimiz, munis opa-singillarimizdir.   

Shuni mamnuniyat bilan ta’kidlashni istardimki, ushbu qutlug‘ kunlarda kombinatda faoliyat olib borayotgan 14 ming nafardan ortiq xotin-qizlarimiz va 600 nafarga yaqin rahbar ayollarimiz o‘zlarining fidokorona mehnati va olijanob fazilatlari bilan bugungi kunda davlatimiz tomonidan belgilab berilgan ulug‘vor vazifalarni amalga oshirishda beqiyos hissa qo‘shmoqda. Buning uchun barchangizga har qancha tahsin va tasannolar aytsak, arziydi. 

Bugun davr shiddat bilan o‘zgarmoqda. Bu o‘zgarishlar kombinatimiz jamoasi oldiga ham katta talablarni qo‘ymoqda. Yangilikka intilish, doimiy izlanish, shaxsiy mas’uliyat, Vatanimiz taraqqiyotiga daxldorlik tuyg‘usi har birimizning asosiy maqsadimiz bo‘lishi zarur. Muhtaram Prezidentimiz Shavkat Mirziyoyev tomonidan olib borilayotgan odilona siyosat, xalq turmush farovonligini oshirishni ko‘zlab amalga oshirilayotgan iqtisodiy islohotlar, ezgu maqsadlarimizni tezroq ro‘yobga chiqarish, yurtimiz iqtisodiy salohiyatini yanada rivojlantirish yo‘lida belgilangan vazifalar ko‘lami va ularni o‘z vaqtida so‘zsiz bajarish mas’uliyati ham shuni taqozo etmoqda.

Ishonch bilan aytamanki, ko‘pming kishilik ahil, birdam va hamjihat jamoamiz siz aziz opa-singillarimizning amaliy ishlaringiz, beqiyos ulushingiz bilan oldimizda turgan rejalar – yangi ishlab chiqarish korxonalarini ishga tushirish, eng zamonaviy texnologiyalarni amaliyotga tatbiq etish va jahon bozorida munosib o‘rin egallash kabi ulug‘vor vazifalarni sharaf bilan uddalaydi.

Fursatdan foydalanib, yana bir bor sizlarni ulug‘ ayyom kunlarida qizg‘in muborakbod etaman. Qalbimdagi ezgu tilagim shuki, jonajon kombinatimiz ravnaqi yo‘lida sadoqat bilan xizmat qilaylik. Toki ulkan korxonamiz – Navoiy kon-metallurgiya kombinatining respublikamiz iqtisodiy qudratini oshirishga qo‘shayotgan hissasi yanada oshib boraversin. Jonajon kombinatimiz shuhratiga-shuhrat qo‘shilsin.

Barchangizga, jannatmonand yurtimizning kamolini, farzandlaringiz va nabiralaringizning baxtu iqbolini ko‘rish nasib etsin!

Sizlarga mustahkam sog‘lik-salomatlik, oilaviy baxtu saodat, xonadonlaringizga fayzu baraka, ishlaringizga omadlar tilayman.

 

Quvondiq SANAQULOV,

Navoiy kon-metallurgiya kombinati

bosh direktori, O‘zbekiston Qahramoni.

 

Biz bilan bog'lanish

  • Umumiy bo‘limi (devonxona): 0(436) 227-71-64, +998 79 227-71-64
  • Ishonch telefoni: 0(436) 227-72-22, +998 79 227-72-22

    Mualliflik huquqi © NKMK, 2015. Barcha huquqlar himoyalangan.   

Axborotdan foydalanish shartlari

Siz bu yerdasiz: Bosh sahifa Rahbariyat Rahbariyatning rasmiy bayonotlari AYOL BORKI, OLAM MUNAVVAR!