Система Orphus

Shriftning o'lchamini

Qarama-qarshilik

        
Siz bu yerdasiz: Bosh sahifa Rahbariyat Rahbariyatning rasmiy bayonotlari Navoiy kon-metallurgiya kombinati bosh direktori, O‘zbekiston Qahramoni Q.S.Sanaqulovning O‘zbekiston Respublikasi mustaqilligining 27 yilligi munosabati bilan NKMK ko‘pming kishilik mehnat jamoasi uchun TABRIGI

Navoiy kon-metallurgiya kombinati bosh direktori, O‘zbekiston Qahramoni Q.S.Sanaqulovning O‘zbekiston Respublikasi mustaqilligining 27 yilligi munosabati bilan NKMK ko‘pming kishilik mehnat jamoasi uchun TABRIGI

Aziz do‘stlar, qadrli hamkasblar!

 

Ozod va obod Vatanimiz xalqi katta tantana arafasida turibdi. Yana sanoqli kunlardan so‘ng eng ulug‘, eng aziz bayramimiz – O‘zbekiston Respublikasi mustaqilligining 27 yilligini zo‘r shodu xurramlik, yurtimizda kechayotgan olamshumul o‘zgarishlar, qo‘lga kiritilayotgan yutuqlar, iqtisodni  rivojlantirish, aholi turmush farovonligini oshirish yo‘lida amalga oshirilayotgan islohotlar samaralaridan quvonish va shukronalik hissi bilan kutib olamiz.

Istiqlol bayrami tobora yaqinlashgani sari har birimizni jannatmakon yurt – O‘zbekiston farzandi ekanligimizdan faxrlanish hissi chulg‘ab oladi. Mustaqillikning ijtimoiy hayotimiz va o‘zligimizni tanishdagi beqiyos o‘rni, ahamiyati teranroq namoyon bo‘laveradi. Zero, O‘zbekiston Res­publikasi Prezidentining “O‘zbekiston Respublikasi davlat mustaqilligining yigirma yetti yillik bayramiga tayyorgarlik ko‘rish va uni o‘tkazish to‘g‘risida”gi qarorida “O‘tgan davr biz uchun g‘oyat muhim bir haqiqatni takror va takror tasdiqlab bermoqda. Erkin va farovon hayotimizni, buyuk kelajagimizni faqat mustaqillik asosida qurishimiz, odamlarimiz, el-yurtimizni faqat mustaqil siyosat asosida rozi qilishimiz mumkin. Faqat mustaqillik bugungi va kelgusi avlodlar uchun misli ko‘rilmagan imkoniyatlar ochib beradi. Shu ma’noda, mamlakatimiz istiqlolini, u bilan bog‘liq tarixiy sana va voqea-hodisalarning mohiyatini chuqur anglash va qadrlash, har tomonlama munosib nishonlash ijtimoiy-siyosiy va ma’naviy hayotimizda alohida muhim o‘rin tutadi”, - deyilishi ayni haqiqatdir.

Mustaqillik Vatanimizning shonli tarixida tom ma’noda tub burilish, yangi jamiyat qurish davrini boshlab berdi. Bugun O‘zbekiston dunyoga yuz ochmoqda, jahon hamjamiyatida o‘zining munosib o‘rniga ega bo‘lib bormoqda. Muhtaram Prezidentimiz Sh.M.Mirziyoyevning 2017-2021 yillarda O‘zbekiston Respublikasini rivojlantirishning beshta ustuvor yo‘nalishi bo‘yicha Harakatlar strategiyasida belgilab berilgan vazifalarni ro‘yobga chiqarish yuzasidan ijtimoiy hayotimizning barcha soha va tarmoqlarida shitob bilan kechayotgan demokratik jarayonlar, sud-huquq tizimida amalga oshirilayotgan islohotlar xorijiy siyosatchilar tomonidan e’tirof etilmoqda. Istiqlol bayrami arafasida butun mamlakatimiz bo‘ylab “Aziz va yagonamsan, jonajon O‘zbekistonim!” shiori ostida o‘tkazilayotgan tashkiliy-amaliy, ma’naviy-ma’rifiy tadbirlarda yurtimizda mustaqillik davri, ayniqsa so‘nggi yillarda sanoat, qishloq xo‘jaligi, madaniyat, sport, xalq turmush farovonligini yuksaltirish borasida erishilayotgan yutuqlar haqida baralla aytilmoqda.

Navoiy kon-metallurgiya kombinati ahil jamoa­si har doim bo‘lganidek, O‘zbekiston Respublikasi mustaqilligining 27 yillik bayramini munosib mehnat sovg‘alari bilan qarshi olayapti. Korxonamizda oltin va uran ishlab chiqarish bo‘yicha joriy yilning yetti oylik topshirig‘i sharaf  bilan bajarildi. Bunday muhim mahsulotlar ishlab chiqarish ko‘rsatkichlari o‘tgan yilning shu davriga taqqoslaganda mos tarzda 100,7 va 101,2 foizni tashkil etayapti. Yetti oyda 8 milliard 718, 8 million so‘mlik iste’mol mollari ishlab chiqarilib, reja oshirib uddalandi. Ishlab chiqarilgan mahsulotlar tannarxini 258 milliard so‘mdan ko‘proqqa arzonlashtirishga erishilgani kombinat jamoasining yana bir katta yutug‘i bo‘ldi.

Yurtboshimiz Sh.Mirziyoyev tomonidan kombinatni rivojlantirishning 2026 yilgacha bo‘lgan davrga mo‘ljallangan dasturi doirasida keng ko‘lamli ishlar olib borilayotganligini mamnuniyat bilan ta’kidlamoqchiman. Ayni paytda dasturda belgilangan “Auminzo-Amantoy” koni  bazasida 5-gidrometallurgiya zavodini, “Oltinni uyumda ishqorlash sexi” konida texnogen chiqindilarni qayta ishlash majmuasini barpo etish, “Muruntov” koni 5-navbatini ishga tushirish, Shimoliy kon boshqarmasi 3-gidrometallurgiya zavodida “Ko‘kpatas” va “Dovgiztov” konlarining ishlanishi qiyin bo‘lgan rudalaridan oltin ajratib olish texnologiyasini takomillashtirish kabi investitsion loyihalar muvaffaqiyatli amalga oshirilmoqda.

Kombinatda qutlug‘ bayramlar, shonli sanalar arafasida ishlab chiqarish va ijtimoiy ob’ektlarni foydalanishga topshirish an’anaga aylangan. Mustaqillikning 27 yilligi nishonlanadigan kunlarda ham yangidan qurilgan yoki qayta rekonstruksiya qilingan ob’ektlar ishga tushiriladi. Janubiy kon boshqarmasining Zarmitan sanoat maydonidagi “G‘ujumsoy” koni shaxtasi, Samarqand viloyatining Qo‘shrabot tumani “Chorloq” uchastkasida 300 bosh qoramolga mo‘ljallangan chorvachilik fermasi, Malik­rabot qo‘rg‘oni va “Do‘stlik” agrofirmasi issiqlik ta’minoti tizimini rekonstruksiya qilishning birinchi bosqichi kabi ob’ektlar shular jumlasidandir. Nurobod shahridagi “Ko‘zmunchoq” bolalar bog‘chasi to‘la rekonstruksiya qilinib, zamonaviy qiyofa kasb etgan holda jajji bolajonlarimizga topshirildi. Yaqin kunlarda 5-kon boshqarmasining 4-geotexnologik konida texnologik qorishmadan reniy ajratib olish bo‘linmasi, Tomdi tumanida 4 ming bosh mayda molga mo‘ljallangan qo‘ychilik kompleksi hamda Uchquduq shahridagi qayta rekonstruksiya qilinib, yangidan jihozlantirilgan “Konchi” profilaktoriysi ham ishga tushiriladi.

Xalqimizda “Hashar – elga yarashar” degan dono naql bor. Kombinatimiz ahil jamoasi obodonchilik oyligi, joriy yil 18 va 19 avgust kunlari butun respublikamiz bo‘ylab o‘tkazilgan umumxalq hasharida faol ishtirok etdi. Hasharda ishchi-xizmatchilarimiz, muhandis-texnik xodimlarimiz kuchi bilan bo‘linmalar hududidagi ko‘cha va xiyobonlar, maydonlar, suv yo‘llari tozalandi, qabristonlar, muqaddas qadamjolarda obodonlashtirish va ko‘kalamzorlashtirish ishlari bajarildi. Ijtimoiy himoyaga muhtoj oilalar, nogironlar, yolg‘iz keksalarga 15 million so‘mlik moddiy yordam ko‘rsatildi.

 

Qadrli hamkasblar!

 

Sizlarni Mustaqillik bayrami bilan muborakbod etib, barchalaringizga sihat-salomatlik, oilaviy totuvlik, xonadonlaringizga qut-baraka, yurtimiz iqtisodini rivojlantirish yo‘lidagi ishlaringizda ulkan omadlar tilayman!

 

Biz bilan bog'lanish

  • Umumiy bo‘limi (devonxona): 0(436) 227-71-64, +998 79 227-71-64
  • Ishonch telefoni: 0(436) 227-72-22, +998 79 227-72-22

    Mualliflik huquqi © NKMK, 2015. Barcha huquqlar himoyalangan.   

Axborotdan foydalanish shartlari

Siz bu yerdasiz: Bosh sahifa Rahbariyat Rahbariyatning rasmiy bayonotlari Navoiy kon-metallurgiya kombinati bosh direktori, O‘zbekiston Qahramoni Q.S.Sanaqulovning O‘zbekiston Respublikasi mustaqilligining 27 yilligi munosabati bilan NKMK ko‘pming kishilik mehnat jamoasi uchun TABRIGI