Bepoyon Qizilqum cho‘llariga bahor keldi... Ona tabiat o‘yg‘onishi, fusunkor fasl tarovati butun olamni yashnatib, xalqimizni bog‘-rog‘lar yaratishga chorlayapti. Fusunkor faslda Navoiy kon-metallurgiya kombinati yoshlari Navoiy shahri, Zafarobod qo‘rg‘oni va Tomdi tumanida jami 30 gektarlik NKMK yoshlar bog‘larini yaratishga bel bog‘lashdi.

Jumladan, Navoiy shahrida 2 gektarlik maydonga 1 ming 400 tup olma, Zafarobod qo‘rg‘onida 20 gektarlik maydonga cho‘l iqlimiga chidamli 16 ming tup tut va qayrag‘och ko‘chatlari, Tomdi tumanida 8 gektarlik maydonga 5 ming tupdan ortiq turli mevali daraxt nihollari qadaldi.

- Bugun respublikamizning barcha hududlaridagi kabi Navoiy viloyatida ham ko‘chat ekish ishlari qizg‘in tus oldi. Kombinat yoshlarini tobora kengroq qamrab olayotgan “Green challenge” ekochorlov aksiyasi doirasidagi xayrli ishlarda shu kunlari ming nafarga yaqin ko‘ngilli yoshlarimiz ishtirok etib, Navoiy shahri, Zafarabod qo‘rg‘oni va Tomdi tumanida maxsus texnikalar imkoniyatlaridan foydalanib, 22,5 ming tupdan ziyod mevali va manzarali daraxt ko‘chatlarini o‘tqazdilar. Albatta, cho‘lda bog‘ yaratish oson emas. Kombinat yoshlari tomonidan hududlar iqlimiga mos tanlangan nihollar o‘tqazilgan maydonlar ertaga ko‘rkam bog‘-rog‘larga, xalqimizning so‘lim maskanlariga aylanishiga ishonamiz, bunga hissa qo‘shayotganligimizdan mamnunmiz, - deydi NKMK yoshlar yetakchilari Kengashi raisi Sanjar Radjabov.

Ha, Navro‘z bayrami oldidan kombinat yoshlari tashabbusi bilan amalga oshirilayotgan ko‘kalamzorlashtirish va obodonlashtirish ishlari aholining ekologik madaniyatini oshirish bilan birga, hududlarga ko‘rkamlik, odamlar diliga xushnudlik, bahoriy kayfiyat olib kirishi bilan ahamiyatlidir.

NKMK Matbuot markazi.