Suv sportining suzish, suv polosi, sinxron suzish va suvga sakrash turlari bo‘yicha mamlakatimiz vakillari ko‘plab xalqaro turnirlarda, Osiyo o‘yinlari hamda qitʼa chempionatlarida yurtimiz sharafini munosib himoya qilib kelishayapti.

Osiyo Olimpiya kengashining Bosh Assambleyasida Toshkent shahri 2025-yilda o‘tkaziladigan Osiyo o‘yinlarini qabul qilish huquqini qo‘lga kiritdi. “Toshkent-2025” yoshlar Osiyo o‘yinlari uchun Toshkentda 160 gektar maydonga Olimpiya shaharchasi va zamonaviy suv sporti markazi qurilayapti. Qolaversa, suv sportiga homiy sifatida belgilangan Navoiy kon-metallurgiya kombinati tomonidan soha rivojiga yetarlicha sarmoya ajratilmoqda.

Joriy yil 17-fevral kuni Navoiy shahrida “NKMK” AJ Boshqaruv raisi – Bosh direktori, O‘zbekiston suzish federatsiyasi raisi Quvondiq Sanaqulov Osiyo suzish federatsiyasi bosh kotibi Taxa al-Kishri bilan uchrashuvi bo‘lib o‘tdi.

Uchrashuvda yaqin istiqbolda respublikamizda suv sportini yanada rivojlantirish, keng ommalashtirish, moddiy-texnika bazasini mustahkamlash yo‘lida izchil saʼy-harakatlar olib borishga kelishib olindi.

“NKMK” AJ Matbuot xizmati.