“Navoiy kon-metallurgiya kombinati” aksiyadorlik jamiyati mutaxassislari Navoiy davlat konchilik va texnologiyalar universiteti olimlari bilan birgalikda muqobil energetika bo‘yicha qator loyihalar amalga oshirilmoqda.

Jumladan, kombinat va universitetning “Elektr energetika” kafedrasi o‘rtasida imzolangan xo‘jalik shartnomasiga ko‘ra, 2021-2022-yillarda shamol elektr stansiyasi va quyosh panellarining gibrid varianti, yaʼni quyosh-shamol mini stansiyalarini yig‘ish va o‘rnatish ishlari amalga oshirildi. Universitet qoshidagi “Texnopark” hududida talabalarni jalb etgan holda quyosh panellarini yig‘ish ishlari olib borildi hamda oliy taʼlim muassasasi hududiga bir komplekt quyosh paneli va shamol generatori olib kelinib, bugungi kunda laboratoriya jihozi sifatida ishlatilmoqda.

Quyosh panellari bilan bog‘liq mavjud muammolardan biri bu ushbu panellar orqali ishlab chiqarilayotgan elektr energiyasi sifatini aniqlash masalasidir. Ayni vaqtda bu masala bir nechta moslamalar yordamida amalga oshirilib kelinadi. “Elektr energetika” kafedrasi olimlari faqat bir qurilmaning o‘zi bilan tok sifatini tekshirish uchun maxsus datchik yaratish ustida ish olib borishyapti.

190420232

Quyosh panellaridan foydalanishdagi muhim masalalardan biri elektr energiyasini zaxiralash muammosidir. Yurtimizga olib kelinayotgan quyosh panellarining narx-navosiga eʼtibor qaratadigan bo‘lsak, akkumulyatorning narxi panelning qiymati bilan deyarli barobar. Yaʼni, quyosh energetikasidan foydalanishda akkumulyatsiyalash qimmatga tushmoqda. Shu bois, yana bir ilmiy loyiha – litiy-ionli akkumulyator batareyalarini takomillashtirish hamda mahalliylashtirish ustida ham ishlar olib borilmoqda.

NKMK mutaxassislari hamda universitet olimlari tomonidan quyosh energiyasidan foydalanib, yer osti sizot suvlarini toza ichimlik suviga aylantirish innovatsion qurilmasi ham yaratilgan. Yangi namunadagi qurilma universitet hududida o‘rnatilgan bo‘lib, 60 metrlik yer osti qudug‘idan sizot suvlarini chiqarib, bir soatda 70 detsimetr kub hajmdagi toza suv yetkazib berayapti.

Bu mavzu haqida batafsil “Konchilar hayoti” gazetasining keyingi sonida o‘qishingiz mumkin.

NDKTU axborot xizmati maʼlumoti asosida.