Navoiy kon-metallurgiya kombinatida energiya resurslaridan foydalanish samaradorligini oshirish maqsadida qayta tiklanuvchi energiya manbalarini ishlab chiqarish yo‘lga qo‘yilgan.

Taʼkidlash kerakki, kombinat korxonalarini issiq suv bilan taʼminlash uchun Ishlab chiqarishni avtomatlashtirish boshqarmasida quvvati 2,4 kilovatt bo‘lgan geliokollektorlar ishlab chiqarilmoqda. Bunda ularning asosiy qismlarini mahalliylashtirish evaziga gelioqurilmalar tannarxi 50 foizgacha kamaytirildi.

Yaqinda 5-gidrometallurgiya zavodida 220 ta geliokollektorlar o‘rnatilib, foydalanishga topshirildi. Hozirda har bir gelioqurilmada sutkasiga 6 700 kilokaloriya issiqlik ishlab chiqarilmoqda. Buning evaziga bir sutkada shu maqsadda foydalanib kelingan qariyb 600 kubometr tabiiy gaz tejalmoqda.

030520233

Joriy yil yakuniga qadar kombinat bo‘linmalarida o‘rnatiladigan geliokollektorlar soni 4 993 taga yetkaziladi va bu, o‘z navbatida, korxonalarining issiq suvga bo‘lgan ehtiyoji 100 foiz quyosh energiyasi hisobidan qoplanishiga hamda yiliga 13,7 mln kilovatt-soat energiya tejalishiga olib keladi.

Kombinat faoliyatida qayta tiklanadigan quvvat manbalaridan foydalanish bo‘yicha olib borilayotgan keng ko‘lamli ishlar korxonada energiya samaradorligini oshirish muhim ahamiyat kasb etishining isbotidir.

“NKMK” AJ Matbuot xizmati.