Navoiy kon-metallurgiya kombinati bo‘linmalarida ishchi-xodimlarning mehnat muhofazasi va xavfsizlik texnikasiga oid bilimlarini doimiy ravishda oshirish muhim ahamiyat kasb etadi.

Jumladan, iyun oyining birinchi yarimida Markaziy kon boshqarmasida xodimlar uchun “Naryad tizimi” va mehnat muhofazasi bo‘yicha meʼyoriy-texnik hujjatlarni yuritish yuzasidan treninglar tashkil etilmoqda. Zarafshon shahridagi “Oltin vodiy” madaniyat uyida “NKMK” AJ Mehnat muhofazasi va xavfsizlik texnikasi bosh boshqarmasi vakillari tomonidan o‘tkazilayotgan treninglarda rahbarlar va muhandis-texnik xodimlar qatnashmoqda.

O‘tkazilayotgan treninglarda xodimlarga “Naryad tizimi”ning mazmun-mohiyati, uni amalga oshirish va rasmiylashtirish tartibi, masʼul xodimlarning ishlarni tashkil etishdagi majburiyatlari, bajarilayotgan ishlarning nazorati, mehnat muhofazasi bo‘yicha meʼyoriy-texnik hujjatlarni yuritish tartibi va boshqa mavzularda batafsil tushuntirishlar berilmoqda.

Bundan asosiy maqsad ishchi-xodimlarning mehnat muhofazasi va xavfsizlik texnikasiga oid bilimlarini oshirib borish, ishlab chiqarishda yuzaga kelishi mumkin bo‘lgan baxtsiz hodisalar oldini olishga qaratilgan.

“NKMK” AJ Matbuot xizmati.