Mamlakatimizda zamonaviy geologiya industriyasini yaratish, sohani modernizatsiyalash, raqamlashtirish, geologiya-qidiruv ishlarini kengaytirish borasida keng ko‘lamli islohotlar amalga oshirilmoqda. Jumladan, so‘nggi yillarda sohaga katta mablag‘lar ajratilib, texnologiyalar to‘liq yangilandi. Geologiya-qidiruv ishlariga bo‘lgan yondashuv tubdan o‘zgardi, burg‘ilash unumdorligi oshdi, yerosti boyliklari zaxirasi va resurslari ko‘paydi. Bundan tashqari, ko‘plab yangi konlar aniqlanib, davlat zaxirasiga olindi. Ma’dandagi elementlarni aniqlash ko‘lami kengaydi, geologiya-kon zaxirasi xalqaro “JORC” standartlarga o‘tkazildi.

Navoiy kon-metallurgiya kombinatida geologiya sohasi alohida o‘rin egallaydi. Geologlarning zahmatli mehnati evaziga korxona ravnaq topib, bir maromda ishlashi ta’minlanmoqda. Bunda, kombinatda faoliyat olib borayotgan 300 nafarga yaqin geologlarning munosib hissasi bor. Sohani rivojlantirish yo‘lida keyingi yillarda e’tirofga molik ishlar amalga oshirildi. Jumladan, faoliyat ko‘lami to‘la raqamlashtirildi. Mutaxassislar tomonidan kon ishlarini rejalashtirish zamonaviy dasturlar, geologik modellar asosida olib borilayapti, shu o‘rinda mineral resurslari to‘g‘risidagi hisobotlar xalqaro standartlar asosida tayyorlanayotgani, shu kunga qadar 30 dan ortiq kon xalqaro standartlar asosida qayta baholanganini aytib o‘tish joizdir.

Joriy yilda ham bu boradagi ishlar yangicha mazmun kasb etayapti. Kombinatning olti nafar mutaxassisi Avstraliya konchilik ishi va metallurgiya instituti a’zoligiga qabul qilingani ijobiy natija bo‘ldi. Kombinat miqyosida geologiya-qidiruv ishlariga ajratiladigan mablag‘lar o‘tgan yilga nisbatan ikki barobarga oshirildi. 2023-yilda “O‘zbek geologiya qidiruv” AJ bilan hamkorlikda geologiya-qidiruv ishlarini olib borish reja qilingani kelgusida yangi konlarni qidirib topish, zaxirasini aniqlashga xizmat qiladi. Ya’ni, 41 ta geologiya-qidiruv loyiha bo‘yicha 195 ming pagon metr burg‘ilash, shuningdek, namunalash va tahlil ishlari amalga oshiriladi.

Geologlarning mehnati, kombinat rivojiga qo‘shib kelayotgan hissasi har qanday e’tirofga loyiqdir. O‘zbekistonning tog‘-kon sanoati mineral xomashyo bazasini kengaytirish, oltin zahiralarini qidirib topishda Markaziy, 2-,3-,4-geologiya-qidiruv partiyalaridan tashkil topgan Geologiya-qidiruv ekspeditsiyasi jamoasi ham o‘z hissasini qo‘shib kelmoqda.

Bir so‘z bilan aytganda, ayni paytda kombinatda geologiya sohasida olib borilayotgan ishlar ko‘lami yildan-yilga kengayib, yangi konlarni izlab topishga keng yo‘l ochmoqda. Erishilayotgan natijalar kombinat ko‘rsatgichlarini oshirish, yangi konlarni o‘zlashtirish, eng asosiysi geologiya sohasi davr bilan hamnafas tarzda taraqqiyot yo‘lidan borayotligini ko‘rsatadi.

Manba: “Konchilar hayoti” gazetasining 2023-yil 14-iyuldagi 13-soni

https://www.ngmk.uz/uz/home/blog/press-tsentr/gazeta–konchilar-hayoti-