Mamlakatimiz mustaqillik yillarida Navoiy kon-metallurgiya kombinati tomonidan bunyod etilgan gidrometallurgiya zavodlarining aksariyati Qizilqum kengliklarida joylashgan. Shu jumladan, kombinat mutaxassislari tomonidan barpo etilgan 7-gidrometallurgiya zavodi – texnogen chiqindilarni qayta ishlaydigan yirik sanoat korxonasi.

2021-yilda “Oltinni uyumda ishqorlash sexi” koni negizida to‘liq quvvatda ishga tushirilgan zavodda yiliga qariyb 16 mln tonna texnogen chiqindilar qayta ishlanmoqda. Zamonaviy texnologiyalarga asoslangan korxonada murakkab jarayonlar orqali qayta ishlangan (texnogen) maʼdanlardan mahsulot olinayapti. 2020-yilda dastlabki bosqichda 3,3 mln tonnadan ortiq maʼdan qayta ishlangan bo‘lsa, bu ko‘rsatkich 2021-yilda 12,1 mln tonnani, 2022-yilda qariyb 16 mln tonnani tashkil etdi. Shu yilning o‘tgan yetti oyida zavodda 9,3 mln tonna texnogen chiqindilar qayta ishlandi.

Korxonaning kombinatning boshqa gidrometallurgiya zavodlaridan farqi shundaki, bu yerda qo‘llanilayotgan texnologiyalar evaziga qayta ishlangan maʼdanni yana qayta ishlab, mahsulot olish imkoniyati mavjud. Texnogen chiqindilarni qayta ishlashning muhim jihatlaridan biri bu 7-gidrometallurgiya zavodida mahsulot tannarxini sezilarli darajada pasaytiradigan maʼdan qazib olish va tashish xarajatlarining yo‘qligidir. Ushbu ishlab chiqarish texnologiyasi jahon qimmatbaho metallar bozorida raqobatbardosh bo‘lish imkonini beradi.

Zavod jamoasining innovatsion yondashuvi tufayli 2021-yilning may oyidan boshlab, 2-gidrometallurgiya zavodining chiqindini tashish, joylashtirish va aylanma suv taʼminoti sexidan 7-gidrometallurgiya zavodiga suvni texnologik jarayonga qabul qilish va ushbu suvdan qo‘shimcha mahsulot olish yo‘lga qo‘yildi.

850 nafarga yaqin zavod mutaxassislari, muhandis-texnik xodimlari doimiy harakatda, izlanishda bo‘lib, belgilangan rejalarni muntazam bajarish uchun astoydil mehnat qilmoqda.

“NKMK” AJ Matbuot xizmati.