Joriy yilda Navoiy kon-metallurgiya kombinatida kuz-qish mavsumiga tayyorgarlik borasida qanday ishlar olib borilayotganligi to‘g‘risida “NKMK” AJ bosh energetigi G‘olibjon Xolboyev bilan suhbat:

– Kombinat yuzlab katta-kichik ishlab chiqarish uchastkalaridan tarkib topgan, geografik jihatdan keng maydonda joylashgan. Qoraqalpog‘iston Respublikasi, Navoiy, Samarqand, Jizzax, Surxondaryo va Xorazm viloyatlarida bo‘linmalar faoliyat olib bormoqda. Har qanday sharoitda ishlab chiqarish aslo to‘xtamasligi, bir maromda ishlashi, taʼminotda aslo uzilishlar bo‘lmasligi kerak. Shu bois, har yili kuz-qish mavsumiga aniq rejalar asosida jiddiy tayyorgarlik ko‘ramiz. Kerakli materiallar zaxirasini yaratamiz, elektr energiyasi, tabiiy gaz, suv va issiqlik energiyasi taʼminoti obyektlari nazoratdan o‘tkaziladi. Aniqlangan muammolarni tezkor hal etish va masʼuliyatli mavsumga puxta tayyorgarlik ko‘rish uchun keng qamrovli choralar ko‘riladi.

O‘tgan yil anomal sovuq kelgani, taʼminotda kuzatilgan uzilishlar barchaga katta saboq bo‘ldi. Kombinatda ko‘rilgan choralar ularning salbiy oqibatlaridan asrab qoldi. Mavsumni betalofat o‘tkazdik. Joriy yildagi tayyorgarlik ishlarini allaqachon boshlab yuborganmiz.

Hozirgi kunda kombinat balansida 341 kilometrlik suv quvuri, 59 kilometrlik tabiiy gaz quvuri, 124 kilometr issiqlik tarmoqlari, 777 dona transformator podstansiyalari, 1 030 kilometrlik elektr energiyasi tarmog‘i mavjud.

2023-2024-yillar kuz-qish mavsumiga tayyorgarlik bosqichida mavjud energiya taʼminoti tarmoqlari, jumladan, magistral suv quvurlari, qozonxonalar, issiqlik tarmoqlari, podstansiyalar va boshqa ishlab chiqarish obyektlarining holati chuqur o‘rganib chiqildi. Aniqlangan kamchiliklar joyida bartaraf etilib, mavsumga tayyorgarlik ishlari bosqichma-bosqich olib borilmoqda. Aniq misollarga tayanadigan bo‘lsak, 213 kilometrlik elektr tarmoqlari, 140 kilometrlik suv quvurlari, 100 tadan ortiq nasoslar, 59 ta gaz taqsimlash punktlari, 135 ta podstansiya, 53 ta qozon, bino va inshootlarning 15 ming metr kvadrat tom qismlari joriy va kapital taʼmirlandi. Bundan tashqari, 1,5 kilometrlik issiqlik taʼminoti quvurlari almashtirildi, issiqlik taʼminoti quvurlariga 6 ming metr kvadratdan ziyod issiqlik qoplamalari o‘rnatildi.

Kuz-qish mavsumiga zarur zaxiralarni yaratish bo‘yicha ham ishlar olib borilmoqda. Mavsum davomida elektr energiyasi va tabiiy gazni tejash yuzasidan tizimli ishlar olib borilmoqda. Shuningdek, yoqilg‘i-moylash materiallari va boshqa jihozlarga bo‘lgan ehtiyojning zaxirasi ham shakllantirilmoqda.

Xulosa qilib aytadigan bo‘lsam, kuz-qish mavsumiga tayyorgarlik ishlarini shu yilning 1-oktyabriga qadar to‘la yakunlaymiz. Kombinat ishlab chiqarish tarmoqlarining bir maromda, barqaror, betalofat ishlashi taʼminlanadi. Bunga, barcha imkoniyatlar mavjud.

P/s: Kuz-qish mavsumida barcha ishlab chiqarish bo‘linmalarida maxsus texnikalar va zaruriy jihozlar bilan taʼminlangan tezkor avariya guruhlari tuzilib, ularning faoliyati bo‘linmalardagi dispetcherlik xizmatlari orqali 24 soat davomida tartibga solinadi.

“NKMK” AJ Matbuot xizmati.