Navoiy kon-metallurgiya kombinatida “Yashil energetika” texnologiyalari muhim ahamiyat kasb etib, energiya resurslaridan foydalanish samaradorligini oshirish maqsadida qayta tiklanuvchi energiya manbalaridan keng foydalanilmoqda.

Bugungi kunda kombinat bo‘linmalaridagi ishlab chiqarish korxonalarini issiq suv bilan taʼminlash uchun quyosh suv isitgichlarini o‘rnatish ishlari amalga oshirilmoqda. Xususan, 2023-yil oxirigacha Shimoliy kon boshqarmasining ishlab chiqarish obyektlarida 756 ta va korxona xodimlarining turar-joy binolarida 225 ta quyosh suv isitgichlarini o‘rnatish rejalashtirgan.

Shuningdek, joriy yilda kombinat mutaxassislari tomonidan kon boshqarmasining Issiqlik, suv, gaz taʼminoti va oqava suvlar sexi hududida 477 ta quyosh suv isitgichlaridan iborat bo‘ladigan yirik quyosh suv isitish stansiyasini qurish ishlari olib borilmoqda. Ushbu stansiya to‘liq quvvatda ishga tushirilgandan so‘ng sanoat obyektlarining aprel-oktyabr oylarida issiq suvga bo‘lgan ehtiyoji 100 foiz quyosh suv isitish qurilmalari hisobidan qoplanadi hamda yiliga 80 ming kubometrdan ortiq tabiiy gazni tejash imkoni yaratiladi.

Kombinat faoliyatida qayta tiklanadigan quvvat manbalaridan foydalanish bo‘yicha olib borilayotgan keng ko‘lamli ishlar korxonada energiya samaradorligini oshirish muhim ahamiyat kasb etishining isbotidir.

“NKMK” AJ Matbuot xizmati.