PRESS-RELIZ

2023-yil 31–oktabr kuni “NKMK” AJ Navoiy mashinasozlik zavodida Navoiy kon-metallurgiya kombinati tashkil topganligining 65 yilligi hamda Navoiy mashinasozlik zavodi tashkil topganligining 60 yilligiga bag’ishlab ommaviy axborot vositalari vakillari va jurnalistlar uchun press-tur va matbuot anjumani o‘tkazildi.

Press-tur davomida OAV vakillari va jurnalistlar zavodining yirik sexlarida bo‘lib, korxonada ish jarayonlari va ishlab chiqarish quvvatlarini oshirish bo‘yicha olib borilayotgan amaliy ishlar bilan yaqindan tanishib, ishchi-xodimlar bilan suhbatlashdilar.

311020232

Taʼkidlandiki, bugungi kunda mazkur zavod mahalliylashtirilgan va import o‘rnini bosuvchi mahsulotlar ishlab chiqarish bo‘yicha respublikamizda eng yuqori o‘rinlarni egallab kelayapti. Ayni paytda korxonada 3,5 ming nafar muhandis-texnologlar, metallurglar, mexaniklar, konstruktorlar va boshqa kasb egalari fidokorona mehnat qilishmoqda.

Navoiy mashinasozlik zavodida 15 ming turdan ortiq yuqori sifatli mahsulotlar, shu jumladan, metall va yog‘ochga ishlov beruvchi dastgohlar, yirik kon texnikalari uchun detallar ishlab chiqarilmoqda. Kombinat ehtiyoji uchun zarur bo‘lgan 97 foizlik ehtiyot qismlar, uskuna va jihozlar NMZda tayyorlanmoqda.

311020233

2023-yilda zavod ishlab chiqarish quvvatlarini oshirish doirasida “Mexanik yig‘uv sexini texnik va texnologik qayta jihozlash” loyihasi amalga oshirildi. Mazkur loyiha bo‘yicha sexning yangi binosi qurilib, zamonaviy, samaradorligi yuqori dastgohlar ishga tushirildi. Yangi sexning ishga tushirilishi og‘irligi 980 tonnagacha bo‘lgan tegirmonlar, shuningdek, yanchish uskunalari, nasoslar, quyultirgichlar ishlab chiqarish va ularni taʼmirlash, og‘irligi 400 tonnagacha bo‘lgan yirik o‘lchamdagi jihozlarga ishlov berish imkonini berdi.

Shu bilan zavodning Quymachilik sexida ishlab chiqarilgan mahsulotlar hajmini oshirish maqsadida 25 tonnalik zamonaviy metall eritish pechi ishga tushirildi. Ushbu pech metall eritish quvvatini yiliga 30 foizgacha oshirish imkonini beradi.

311020235

So‘ng tadbir ishtirokchilari uchun NMZ majlislar zalida matbuot anjumani tashkil etildi.

Matbuot anjumanida OAV vakillari va jurnalistlar savollariga atroflicha javoblar berildi.

“NKMK” AJ Matbuot xizmati.