So‘nggi yillarda davlatimiz Rahbari tomonidan xotin-qizlarga qaratilayotgan ulkan e’tibor, ko‘rsatilayotgan ehtirom va g‘amxo‘rliklar jamiyatimizda ayollarning mavqeini yanada yuksaltirishga xizmat qilmoqda. Bunday ezgu ishlar mamlakatimizning ulkan sanoat korxonasi bo‘lgan NKMKda ham o‘z aksini topmoqda. Bugun kombinatimizda xotinqizlarimiz mehnatini qadrlash, ularga katta ishonch bildirish an’anaga aylangan, chunki ular turli sohalarda erkaklar bilan bir safda faoliyat yuritib kelmoqdalar.

“Navoiy kon-metallurgiya kombinati” aksiyadorlik jamiyatida tashkil etilgan Ayollar Kengashining faoliyat yo‘nalishi qanday? Qanday maqsad va vazifalarni ko‘zlaydi? – “Navoiy kon-metallurgiya kombinati” aksiyadorlik jamiyatining jamoatchilik asosida tashkil etilgan Ayollar Kengashi raisi Sabohat Nazarovaga shu kabi savollar bilan murojaat qildik.

– Yurtimizda va aynan kombinatimizda xotin-qizlarni qo‘llab-quvvatlashga katta e’tibor qaratilmoqda. Ayollar Kengashi korxona va uning hududiy bo‘linmalarida ayollarimiz uchun yaratilgan shart-sharoitlarni o‘rganish, gender tenglik, har bir bo‘linmada shakllantirilgan kadrlar zaxirasiga xotin-qizlarning nomzodlarini tavsiya etish va boshqa muhim yo‘nalishlarda faoliyat olib bormoqda.

Xotin-qizlarimizning muammolarini o‘z vaqtida aniqlash, ularga ijtimoiy, huquqiy va psixologik ko‘mak ko‘rsatish maqsadida, Ishchi guruh tashkil etilgan bo‘lib, guruh joylarga chiqqan holda muntazam ravishda xotin-qizlarimizga yaratilgan mehnat sharoitlari bilan tanishib, ularning masalalarini joyida hal etish uchun xizmat qilayapti.

Mamlakat va jamiyat hayotida faollik hamda tashabbuskorlik ko‘rsatgan, ko‘p yillik fidokorona mehnati va korxona ravnaqiga qo‘shgan hissasi inobatga olinib, xotin-qizlarimiz doimiy ravishda rag‘batlantirib kelinmoqda. Jumladan, o‘tgan yili kombinat va uning bo‘linmalarida faoliyat olib borayogan ayollarimizning 5 nafari “Do‘stlik”, “Mehnat shuhrati” ordenlari va “Mo‘tabar ayol” ko‘krak nishoni bilan taqdirlangan bo‘lsalar, 50 nafari turli darajadagi “Konchilik shuhrati” ko‘krak nishoni bilan, 350 nafari esa Faxriy yorliqlar bilan taqdirlanishdi.

Ayollar Kengashi tashabbusi bilan xotin-qizlar o‘rtasida ularning intellektual salohiyatini yuksaltirish, sog‘lom ilmiy-ma’rifiy muhitni yaratish maqsadida “Alisher Navoiy ijodida komil inson tarbiyasi”, “Balli qizlar!”, “NKMK Oltin ayoli”, “Nafosat malikalari” ko‘rik-tanlovlari o‘tkazib kelinmoqda. “Zakovat” intellektual o‘yinini o‘tkazish ham an’anaga aylanib kelmoqda. Bunday tadbirlarning yuqori saviyada o‘tkazilishida Markaziy, Shimoliy, Janubiy, “Qizilqum” kon boshqarmasi, Zarafshon qurilish boshqarmasi, “Sanoatelektrmontaj” tresti, Geologiya-qidiruv ekspeditsiyasi Ayollar Kengashining jamoatchilik asosidagi raislari va faollari bo‘lgan S.Boboyorova, D.Xalimova, N.Boltayeva, N.Djavberdiyeva, N.Ro‘ziyeva, M.Ro‘ziyeva, M.Tursunovalarning xizmatlari beqiyosdir.

NKMK Ayollar Kengashi va viloyat oila va xotin qizlar boshqarmasi, viloyat huquq-tartibot organlari xodimlari, diniy idora vakillari, Ayollarni reabilitatsiya qilish va moslashtirish markazi mas’ul xodimlari hamkorligida “Oila – muqaddas dargoh, tarbiya maktabi”, “Oila – baxt qo‘rg‘oni”, “Oila mustahkamligi va mas’uliyati, oilaviy ajrimlar va ularning oldini olish”, “Biz zo‘ravonlikka qarshimiz” mavzularida tashkil etilayotgan qator ma’naviy-ma’rifiy, targ‘ibot tadbirlari yaxshi samara berayapti.

Xotin-qizlarning ishdan bo‘sh vaqtlarida daromad keltiruvchi hunarlarni egallashlari uchun NKMK bo‘linmalarida faoliyat olib borayotgan ayollarga kashtachilik, tikuvchilik va boshqa hunarmandchilik sirlarini o‘rgatish bo‘yicha mahorat darslari o‘tkazilmoqda.

O‘zbekiston Respublikasi Prezidentining 2020-yilning 30-oktabrida imzolangan “Sog‘lom turmush tarzini keng tadbiq etish va ommaviy sportni yanada rivojlantirish chora-tadbirlari to‘g‘risida”gi Farmoni ijrosini ta’minlash maqsadida, “Sog‘lom ayol – buyuk kelajak”, “5 ming qadam” shiorlari ostida ommaviy marafonlar, “Gimnastrada” , “Men, oyim, dadam-sportchi oila”, “Sport malikalari” kabi musobaqalar o‘tkazilib, g‘olib xotin-qizlarimiz diplom va qimmatbaho sovg‘alar bilan takdirlanmoqdalar.

Ta’kidlash joizki, kombinatda gender tenglik masalasiga ham katta e’tibor qaratilgan. Mazkur mavzu bugungi davrning dolzarb masalalaridandir. Navoiy kon-metallurgiya kombinati respublikada ilk bora 2020-yilda o‘tkazilgan “Gender tenglik faoli” milliy tanlovida, “Gender tenglikni ta’minlashda eng faol vazirlik” nominatsiyasida g‘oliblikni qo‘lga kiritgani NKMK mehnat jamoasiga bildirilgan yuksak e’tirofdir.

2023-yil dekabr oyida o‘tkazilgan “Gender tenglik faoli” respublika milliy tanlovida “Gender tenglikni ta’minlashda eng faol tuman davlat organi” nominatsiyasida Shimoliy kon boshqarmasi Ayollar Kengashi 3-darajali diplom bilan taqdirlandi.

Sabohat Nazarovaning so‘zlariga qo‘shimcha tarzda shuni aytish kerakki, keyingi yillarda O‘zbekiston xotin-qizlarining ovozi xalqaro minbarlarda ham dadil yangrayotgani barchamizni quvontiradi. O‘tgan yili Toshkentda o‘tkazilgan 5-Xalqaro kon-metallurgiya forumida kombinatning bir qator mutaxassislari ham qatnashib, xotin-qizlarning konchilik sanoatidagi roli, ularning yutuqlari to‘g‘risida mazmunli chiqish qildi.

“Navoiy kon-metallurgiya kombinati” aksiyadorlik jamiyatida mehnat qilayotgan oqila va mehribon ayollarimiz, opa-singillarimizga yaratib berilayotgan shart-sharoitlar ularning ertangi kunga ishonchini oshirib, hayotdan rozi bo‘lib yashashlariga zamin yaratayapti. Oila tayanchi, jamiyat ustuni bo‘lgan onalarimiz, ayollarimiz hayotdan rozi bo‘lsa, butun xalqimiz ham rozi bo‘ladi.

Manba: “Konchilar hayoti” gazetasining 2024-yil 7-martdagi 5-soni