Navoiy kon-metallurgiya kombinatida inson hayoti, sog‘ligi bilan bog‘liq bo‘lgan mehnat muhofazasi va xavfsizlik texnikasini taʼminlash muhim ahamiyat kasb etadi. 28-aprel – Butunjahon mehnatni muhofaza qilish kuni munosabati bilan kombinat bo‘linmalarida turli tadbirlar “Iqlim o‘zgarishining mehnat xavfsizligi va gigiyenasiga taʼsiri” shiori ostida tashkil etildi.

Alohida taʼkidlash joizki, kombinat tarixida ilk bor Mehnat muhofazasi, sanoat xavfsizligi va ekologiya (ESG) departamenti, uning tarkibida bosh boshqarma, tahlil guruhi tashkil etilishi soha mutaxassislarining vazifa va vakolatlarini yanada kengaytirdi.

290420242

Bugungi kunda sohada 184 nafar mutaxassis faoliyat olib bormoqda. Ularning saʼy-harakatlari, doimiy tekshirishlar va targ‘ibot-tashviqot ishlarini olib borishi, har hafta juma kuni o‘tadigan selektor yig‘ilishlarida mehnat muhofazasi va xavfsizlik texnikasi mavzusi birinchi masala sifatida tahliliy-tanqidiy muhokama etib kelinayotgani ishlab chiqarishda turli ko‘ngilsizliklarning oldingi yillarga nisbatan keskin kamayishiga olib keldi.

Shu bilan birga, 16 nafar mehnat muhofazasi va xavfsizlik texnikasi mutaxassisi xalqaro sertifikatga ega bo‘lib, “NKMKning mehnat muhofazasi bo‘yicha eng yaxshi vakolatli xodimi”, “Mehnat muhofazasi va xavfsizlik texnikasi bo‘yicha ishlarning eng yaxshi tashkilotchisi, ish joylarida qoida va qonunlarining eng yaxshi bilimdoni” anʼanaviy ko‘rik-tanlovlari o‘tkazilib kelinmoqda.

290420243

Kombinatda mazkur yo‘nalishda amalga oshirilayotgan ishlarning asosiy maqsadi ish joyida mehnat muhofazasi va xavfsizlik texnikasining muhim talablariga rioya qilish, ishlab chiqarishda yuzaga kelishi mumkin bo‘lgan baxtsiz hodisalar oldi olinishini taʼminlashga qaratilgan.

“NKMK” AJ Matbuot xizmati.