Navoiy kon-metallurgiya kombinati respublikadagi elektr energiyasining yirik isteʼmolchilaridan biridir. Korxonada yashil energiyaga o‘tish va qayta tiklanuvchi energiya manbalarini joriy etish bo‘yicha aniq rejalar ishlab chiqilib, tizimli ishlar bajarilayapti.

Xususan, 2024-yilda qayta tiklanuvchi energiya manbalarini joriy qilish hisobiga 319,5 mln kW.h. elektr energiyasi hamda 2,6 mln kubmetr tabiiy gazni tejash belgilangan. Shu yilning 1-may holatiga ko‘ra kombinatda 51,7 mln kW.h. elektr energiyasi tejashga erishildi.

– Korxonada quyosh fotoelektr stansiyalarini joriy qilish bo‘yicha ham keng qamrovli ishlar olib borilmoqda. Bugungi kunda kombinatda jami 1 450 kW. quvvatli quyosh fotoelektr stansiyalari ishga tushirilib, hozirda ular tomonidan yiliga 2,46 mln kW.h. quvvatga ega elektr energiyasi ishlab chiqarilmoqda. Shuningdek, joriy yil yakuniga qadar rejaga qo‘shimcha ravishda 5 700 kW. quvvatli quyosh fotoelektr stansiyasi ishga tushiriladi, – deydi “NKMK” AJ bosh energetigi G‘olibjon Xolboyev.

Quyosh energiyasidan nafaqat elektr energiyasi, balki issiqlik energiyasi ishlab chiqarishga ham alohida eʼtibor qaratilgan. Bugungacha kombinat bo‘linmalarida qariyb 5 ming dona quyosh suv isitgichlari o‘rnatilgan. Natijada joriy yilning aprel-oktyabr oylarida bo‘linmalarning issiq suvga bo‘lgan ehtiyojini to‘liq qayta tiklanuvchi energiya manbalari hisobidan qoplash va yiliga 1,7 mln kubmetr tabiiy gazni iqtisod qilish imkoniyatini yaratadi.

150520242

Qayta tiklanuvchi energiya manbalarini joriy etishdan ko‘zlangan maqsad qimmatli resurslar zaxirasini kamaytirmaslik, atrof-muhitning ifloslanishiga salbiy taʼsir ko‘rsatmaslik hamda boshqa energetik yechimlar bo‘la turib energiyani behuda ishlab chiqarmaslikdir. Shuningdek, katta miqdorda elektr energiyani tejashdan tashqari ishlab chiqarilayotgan mahsulot tannarxini kamaytirishga olib keladi.

“NKMK” AJ Matbuot xizmati.