O‘zbekiston Respublikasi konchilik va metallurgiya sanoati xodimlari kuni munosabati bilan bugun Qo‘shrabot tumani Zarkent qo‘rg‘onidagi “Zarmitan” konida barcha qulayliklarga ega 250 o‘rinli maishiy bino va 80 o‘rinli oshxona foydalanishga topshirildi.

Tadbirda “Navoiy kon-metallurgiya kombinati” AJ Boshqaruvi raisi – Bosh direktori Q.Sanaqulov, Qo‘shrabot tumani hokimi D.Shakarboyevlar ishtirok etib, Janubiy kon boshqarmasi jamoasi, mehnat faxriylari va zarkentliklarni kasb bayrami bilan samimiy muborakbod etishdi.

160520242 (1)

Bugungi kunda kon boshqarmasida 6 ming nafar ishchi-xodim mehnat faoliyatini olib bormoqda. Qo‘shrabot, G‘allaorol tumanlarida joylashgan “Zarmitan”, “G‘ujumsoy”, “Marjonbuloq” konlarida yiliga o‘rtacha 7,6 mln kubometr tog‘ jinsi qazib olinib, 4-gidrometallurgiya zavodi va “Marjonbuloq” oltin ajratish sexida 2,7 mln tonna maʼdan qayta ishlanmoqda.

160520243

Ayni paytda Zarkent qo‘rg‘oni ko‘rkam, zamonaviy maskanga aylandi. Qo‘rg‘onda 875 ta xonadon mavjud bo‘lib, ularda 4 ming nafardan ortiq aholi istiqomat qilmoqda. Qo‘rg‘on yangi ishlab chiqarish va ijtimoiy obyektlar qurilishi hisobiga yildan-yilga kengayib bormoqda. Shu bois, keyingi yillarda hududda ishlab chiqarishni rivojlantirish bilan birga, qo‘rg‘onni obod manzilga aylantirish, ishchi-xodimlarni ijtimoiy himoya qilish yo‘lida ko‘plab xayrli ishlar amalga oshirildi.

160520244

Xususan, ishchi-xodimlar, yosh oilalar va harbiy xizmatchilar uchun ko‘pqavatli uy-joylar, yotoqxonalar, akvapark, “Konchi” madaniyat uyi, “Yoshlar” sport majmuasi, mehmonxona, ishchilar oshxonalari va boshqa inshootlar qad rostladi. Joriy yilda yana har biri 32 xonadonli 2 ta ko‘pqavatli turarjoy foydalanishga topshiriladi va 64 nafar ishchi-xodim uyli bo‘ladi.

160520245

Shuningdek, Zarkentda istirohat bog‘ini barpo etish rejalashtirilgan. Bog‘da keksa-yu yoshlar hordiq chiqarishlari uchun barcha shart-sharoit va imkoniyatlar yaratiladi va u zarkentliklarning sevimli maskaniga aylanadi.

Bayram tadbirlari Janubiy kon boshqarmasi bo‘linmalarida davom etmoqda.

“NKMK” AJ Matbuot xizmati.