18-may kuni Navoiy shahridagi Sport saroyida O‘zbekiston Respublikasi konchilik va metallurgiya sanoati xodimlari kuniga bag‘ishlangan bayram tantanasi bo‘lib o‘tdi. Unda “Navoiy kon-metallurgiya kombinati” aksiyadorlik jamiyati, “Navoiyuran” davlat korxonasi, “NKMK jamg‘armasi” davlat muassasasida mehnat faoliyatini olib borayotgan turli kasb egalari va mehnat faxriylari ishtirok etishdi.

Tantanada kasb bayrami munosabati bilan O‘zbekiston Respublikasi Bosh vaziri Abdulla Aripovning Navoiy kon-metallurgiya kombinati mehnat jamoasiga yo‘llagan tabrigini o‘qib eshittirildi.

180520243

Tadbirda Navoiy viloyati hokimi N.Tursunov ishtirok etib, mamlakatimizning iqtisodiy qudratini mustahkamlashda munosib hissa qo‘shib kelayotgan soha xodimlarini kasb bayrami bilan qutladi.

“NKMK” AJ Boshqaruvi raisi – Bosh direktori Q.Sanaqulov korxonalar jamoalari hamda soha xodimlari va mehnat faxriylarini kasb bayrami bilan muborakbod etib, soha vakillarining amalga oshirgan ishlari, yutuqlarini eʼtirof etdi.

180520244

Tadbirda taʼkidlanganidek, kombinatni rivojlantirish bo‘yicha 2026 yilgacha mo‘ljallangan dastur joriy yilda muddatidan ikki yil oldin bajariladi hamda oltin ishlab chiqarish hajmi 32 foizga oshiriladi. Keyingi bir yilda Nurota tumanidagi “Pistali” koni negizida yiliga 4 mln tonna maʼdanni qayta ishlash quvvatiga ega 6-gidrometallurgiya zavodi, Navoiy mashinasozlik zavodida zamonaviy tegirmonlar ishlab chiqaradigan sex ishga tushirildi. 2024-yilda 3-gidrometallurgiya zavodida yiliga 2 mln tonna maʼdanni qayta ishlash quvvatiga ega 2 ta yangi tegirmon bloki barpo etilmoqda. Joriy yilning o‘tgan to‘rt oyida 27 trln so‘mlik mahsulot ishlab chiqarilib, belgilangan rejalar ortig‘i bilan bajarildi.

Yaqinda 2024-2030-yillarda kombinatni barqaror rivojlantirish dasturi tasdiqlandi. Ushbu dasturda kelgusida kombinatda mahsulot ishlab chiqarish hajmini 37 foizga oshirish vazifasi belgilandi.

180520246

180520247

180520248

Kasb bayrami munosabati bilan bir guruh soha ilg‘orlariga O‘zbekiston Respublikasi tog‘-kon sanoati va geologiya vazirligi va Navoiy viloyat hokimligining faxriy yorliqlari topshirildi. Shuningdek, “NKMK” AJ, “NKMK jamg‘armasi” DMning bir guruh ishchi-xodimlari ko‘p yillik fidokorona mehnati, sohani rivojlantirishga qo‘shayotgan yuksak hissasi uchun hamda kasb bayrami munosabati bilan “NKMK faxriysi” unvoni, “Konchilik shuhrati” ko‘krak nishoni bilan taqdirlandi.

180520249

Bayram tantanasi ishtirokchilariga mazmunli madaniy hordiq bag‘ishlash uchun “Farhod” madaniyat saroyi, “Oltin vodiy”, “Uchquduq” madaniyat uylari ijodiy jamoalari va xonandalarining konsert dasturi namoyish etildi.

1805202410

O‘zbekiston Respublikasi konchilik va metallurgiya sanoati xodimlari kuni munosabati bilan taqdirlangan hamkasblarimiz, kombinat jamoasi hamda soha xodimlarini kasb bayrami bilan samimiy muborakbod etamiz!

“NKMK” AJ Matbuot xizmati.