Navoiy kon-metallurgiya kombinati dunyoda sohaning eng yirik korxonalaridan biri hisoblanadi. Kombinatimiz jamoaning mehnati, sa’y-harakatlari bilan jahon standartlariga mos, sifatli, xaridorgir mahsulotlar ishlab chiqarish evaziga o‘zining mustahkam o‘rniga ega bo‘lib kelmoqda. Har jihatdan mamlakatimizda yetakchi bo‘lgan kombinatda ishlashning o‘zi shon-sharaf va bundan har birimiz faxrlanamiz.

“Qizilqum” kon boshqarmasida oltin, temir kuporosi, suyuq natriy silikati kabi iqtisodiyot va sanoatimiz rivojida muhim ahamiyatga ega bo‘lgan mahsulotlar ishlab chiqariladi. Hozirgi kunda kon boshqarmamiz tomonidan “Rohat”, “Daykali”, “Gorniy”, “Qoraqo‘ton”, “Pistali” oltin konlarini o‘zlashtirish bo‘yicha ochiq va yer osti kon ishlari olib borilmoqda. Kon ishlarida “Epiroc”, “Hitachi”, “Komatsu”, “PAUS” kabi jahonga mashhur kompaniyalarda ishlab chiqarilgan eng zamonaviy texnika va og‘ir yuk ko‘taruvchi avtotransport vositalaridan foydalanilmoqda. Ochiq va yer osti usulida qazib olingan oltin ma’danlar 1-va 6-gidrometallurgiya zavodlarimizda alohida texnologik sxemalar bo‘yicha qayta ishlanmoqda. Kombinatimiz va jamoamizning fidoyi, malakali muhandis va tajribali mutaxassislari, ishchi xodimlarining tinimsiz mehnatlari tufayli o‘tgan yili “Pistali” koni va 6-gidrometallurgiya zavodi ishga tushirildi.

Ishonch bilan ayta olamizki, mamlakatimiz kon-metallurgiya sanoatida yangi yuksalish davri boshlandi. Foydalanishga topshirilayotgan zamonaviy korxonalarimizni loyihalashdan tortib, eng murakkab asbob-uskunalar, masalan, gidrometallurgiya zavodlari uchun tegirmonlar, gravitatsion boyitish uskunalari, sorbsiyali tanlab eritish sig‘imlari, quyiltirgichlar va nasos agregatlari o‘zimizda ishlab chiqarilayotganligi barchamizning yutug‘imizdir.

280520242

Kon boshqarmamizda 3,7 ming nafarga yaqin ishchi-xizmatchilar mehnat qilishyapti. Oxirgi ikki yilda ishga qabul qilingan turli kasb egalarining aksariyati Navoiy davlat konchilik va texnologiyalar universiteti va boshqa oliygohlarni tugatib kelgan yosh mutaxassislardir. Eng muhimi, ayni paytda konlar, zamonaviy zavod va ishlab chiqarish uchastkalarini o‘zimizning yoshlarimiz boshqarayaptilar.

Kasb bayramimizni har doimgidek e’tirof etishga arzirli natijalar bilan qarshi olayapmiz. Ahil jamoamizning fidokorona mehnati tufayli barcha ishlab chiqarish ko‘rsatkichlari bo‘yicha rejalar bajarilmoqda. Jumladan, joriy yilning o‘tgan to‘rt oyida ma’dan qazib olish rejasi – 102,1 foizga, ma’danni qayta ishlash ko‘rsatkichi – 103,9 foizga, tayyor mahsulot ishlab chiqarish rejasi – 104,7 foizga bajarildi. Investitsiya dasturi doirasida 25,6 mln dollar mablag‘ o‘zlashtirilib, mahsulot tannarxini kamaytirish dasturi 114,4 foizga bajarildi va qariyb 9,9 mlrd so‘mlik mablag‘ tejaldi.

280520243

Innovatsion texnologiyalarni joriy etish bo‘yicha kon boshqarmamizda doimiy ishlar olib borilmoqda. 2019-yilda 2-texnologik sexda to‘rtinchi yanchish tegirmoni o‘rnatilib, ishga tushirilishi ma’danlarni qayta ishlash unumdorligini soatiga 210 tonnagacha oshirish imkonini berdi. “Qoraqo‘ton” konining murakkab tarkibli (uglerodli va sulfidli) ma’danlarini qayta ishlash texnologik sxemasini takomillashtirish natijasida “M-6” tegirmon blokining ishlab chiqarish unumdorligi soatiga 17 tonnadan 23 tonnagacha ko‘paytirildi, flotokonsentrat chiqishi 1,5 foizdan 4,5 foizgacha oshirilib, bunda iqtisodiy samara 8,7 mlrd so‘mdan ko‘proqni tashkil qilyapti. 1-texnologik sexda asosiy sorbsiyali sianlash zanjirining rekonstruksiya qilinishi tufayli flotatsiya boyitmasini qayta ishlash ikki baravar, flotatsiya boyitmasidan oltinni ajratib olish 95,5 foizgacha oshirilmoqda. 2-sonli texnologik sex 10 dona regeneratsiya kolonnalari rekonstruksiya qilinib, qo‘shimcha sorbsion pachuklar sifatida foydalanishga topshirildi. Natijada sorbsiya jarayonining vaqtini oshirish hisobiga metall ajratib olishni bir foizga ko‘paytirishga erishildi.

Bundan tashqari 1-sonli texnologik sexning magnit fraksiya qayta ishlash bo‘linmasini rekonstruksiya qilish va kengaytirish ishlarini amalga oshirish hisobiga joriy yilda kon boshqarmamizda temir kuporosi ishlab chiqarish ko‘rsatkichini 736 tonnadan 1 612 tonnagacha oshirish mo‘ljallanmoqda. So‘nggi besh yillikni taqqoslaganda kon boshqarmamizda ilmiy-tadqiqot ishlariga, innovatsion va ratsionalizatarlik faoliyatiga sarf qilinadigan xarajatlar 1,6 mlrd so‘mdan 5,9 mlrd so‘mga, iqtisodiy samara esa 18,9 mlrd dan 49,2 mlrd so‘mga oshdi. Bu esa o‘z navbatida ishlab chiqarish unumdorligi va mahsulot sifatini oshirishga, ishlab chiqarish xarajatlarini kamaytirish va mehnat sharoitlarini yaxshilashga olib kelyapti.

280520244

Korxonamiz yoshlari 2023-yilda “NKMK” AJning “Eng yaxshi ratsionalizatorlik taklifi” tanlovida eshtirok etib, umumjamoa hisobida kombinat bo‘linmalari o‘rtasida faxrli ikkinchi o‘rinni qo‘lga kiritgani tahsinga loyiqdir. Kon boshqarmamizda nafaqat asosiy ishlab chiqarishni kengaytirish, balki ijtimoiy sohani rivojlantirishga ham yetarli e’tibor berilayapti. Korxonamizda ijtimoiy siyosat ishchi-xizmatchilarga munosib mehnat va yashash sharoitlarini ta’minlashga qaratilgan. Masofadagi konlarda ishlaydigan ishchilar uchun barcha sharoitlar yaratilgan, bo‘linmalarda obodonlashtirish va ko‘kalamzorlashtirish ishlari doimiy ravishda olib borilmoqda. “Pistali” koni va 6-gidrometallurgiya zavodi hududidagi maydonlarda “Yashil makon” umummilliy loyihasi doirasida o‘tgan yilning kuzi va joriy yilning bahor mavsumlarida 23,3 ming dona manzarali va 103,5 ming tup butasimon daraxt ko‘chatlari o‘tqazildi. Bundan tashqari, “Pistali” koni negizida smena va vaxta asosida ishlaydigan ishchi-xodimlar uchun 500 o‘rinli shaharcha barpo etildi. Ishchi-xodimlar dam olishi uchun zamonaviy tipdagi xonalar zarur maishiy texnikalar bilan jihozlangan. Ishchi-xodimlar uchun shaharcha maydonida 100 kishilik oshxona ishga tushirildi. Ularning ishdan bo‘sh paytlarida sport bilan shug‘ullanishlari uchun sport majmuasi qurilib bitkazildi. Majmua zarur sport anjomlari bilan jihozlandi. Bundan tashqari, shaharchada mini sport maydoni qurilmoqda va yaqin kunlarda ishga tushiriladi.

Erishilayotgan marralarda jamoamiz har bir a’zosining munosib hissasi bor. Ishlab chiqarish reja-topshiriqlarini muntazam bajarish, iqtisodiy samaradorlikni ko‘zlab texnologik jarayonlarni yanada takomillashtirish, yangi konlarni ochish va zamonaviy texnikalarni qo‘llash kelajakda kon boshqarmamiz jamoasini yangi cho‘qqilarga erishishiga keng yo‘l ochib beradi.

Avazxon EZOZXONOV,

“NKMK” AJ “Qizilqum” kon boshqarmasi direktori.