Barchangizni Markaziy kon boshqarmasining 60 yilligi, 2-gidrometallurgiya zavodi va Tashqi suv ta’minoti birlashgan energoxizmatining 55 yilligi bilan chin qalbimdan samimiy tabriklayman. Zero, bu yubileylar ulkan jamoamiz uchun ham, yurtimiz kon-metallurgiya sanoati uchun ham keng nishonlashga arzigulik, e’tirofga loyiq quvonchli sanalardir.

Yigirma bir ming nafardan ortiq ishchi-xodimlar ishlayotgan Markaziy kon boshqarmasi kombinatning eng yirik bo‘linmasi hisoblanadi. Kombinatda va qayta ishlanayotgan mahsulotning katta qismi shu boshqarma hissasiga to‘g‘ri keladi va dunyo tan olgan “999.9” tamg‘ali oltin quymalar ham shu yerda tayyorlanadi.

Shu o‘rinda, e’tiborlaringizni bir tahlilga qaratmoqchiman! 2017-yilda kon boshqarmasi jamoasi tomonidan 75 million kubometrdan ortiq tog‘ jinsi qazib olingan bo‘lsa, 2023-yilda bu ko‘rsatkich 166 million kubometrni tashkil etib, o‘sish darajasi ikki baravarga oshdi. Yoki 2017-yilda 62 million tonna ma’dan qayta ishlangan bo‘lsa, o‘tgan yili bu ko‘rsatkich qariyb 100 million tonnaga yetdi. Shu boisdan kon boshqarmasini haqiqiy ma’noda kombinatning yetakchi bo‘linmasi, faxri, deyish mumkin. Ishlab chiqarilayotgan oltin davlatimiz xazinasi, yurtimiz iqtisodiyotini mustahkamlashga xizmat qilmoqda. Mana shunday yutuqlari bilan korxonaning shonli tarixi va solnomasini yaratayotgan zarafshonlik zarshunoslarga shon-sharaflar bo‘lsin, degimiz keladi.

Bepoyon Qizilqum o‘z qa’rida ulkan boyliklar, behisob xazinani yashirib yotgan, katta ma’dan zaxirasiga ega, davlatimiz kuch-qudrati va kelajagi bo‘lgan bepoyon sahro, betakror mo‘jiza bo‘lib, Yaratganning xalqimizga beqiyos tuhfasidir! Bunga Qahramon shoirimiz Abdulla Oripov ham o‘zining “Muruntov” she’rida bejizga “Ha, tilla saltanatin, yo‘qdir boshi, uchi ham, U bilan o‘lchangaydir, mamlakatning kuchi ham”, deya ta’rif bermagan. Aslida jazirama issiq, qahraton sovuqda mashaqqat va sabr-qanoat bilan cho‘lda nafaqat mehnat qilish, balki yashashning o‘zi chinakam qahramonlik, haqiqiy jasoratdir.

Barchangizga ma’lumki, muhtaram Yurtboshimiz tomonidan tasdiqlangan 2017-2026-yillarda kombinatni strategik rivojlantirish dasturi asosida jamoamiz bilan birga keyingi 8 yilda juda qattiq mehnat qildik. Natijada 2026-yilgacha mo‘ljallangan dasturni ikki yil oldin – 2024-yilda yakunlashga erishyapmiz.

Buning evaziga kombinatda mahsulot ishlab chiqarish hajmi 32 foizga oshadi. Amaliy natijalarimizni tahlil etganda, yirik investitsion loyihalarning asosiy qismi Markaziy kon boshqarmasi hududida amalga oshirilgani ham sizlarning mehnatingiz mahsulidir. Buning natijasida Qizilqum sahrosida 5 va 7-gidrometallurgiya zavodlari, 2-gidrometallurgiya zavodi ikkinchi navbati, 103 kilometrlik temir yo‘l, “Auminzo-Amantoy”, “Tomdibuloq”, “Balpantov”, “Turbay” kabi yangi konlar va boshqa zamonaviy obyektlar ishga tushirilgani kon-metallurgiya tarixida yangi sahifa ochdi. Buning evaziga hududda 10 mingga yaqin yangi ish o‘rni yaratilib, unga asosan yoshlar ishga qabul qilindi. Yana shuni alohida ta’kidlash joizki, boshqarmaning “Muruntov” koni, 2-gidrometallurgiya zavodi, Avtomobil, Temir yo‘l transporti boshqarmalari, Tashqi suv ta’minoti birlashgan energoxizmati va boshqa muhim ishlab chiqarish tarmoqlari o‘zining yuqori samarasini berib kelyapti.

Bugungi quvonchli kunda kon boshqarmasida ishlab, uning rivojiga o‘z hissasini qo‘shgan insonlar mehnatini e’tirof etish juda o‘rinli bo‘ladi. Darvoqe, o‘z davrida rahbarlik lavozimlarida ishlagan barcha hamkasblarimizning xizmatlari alohida tahsinga munosibdir. Ular izidan Qahramonlar, Davlat mukofoti sohiblari, konchilik va metallurgiyadek mashaqqatli sohaning jonkuyar vakillari yetishib kelmoqda. O‘zbekiston Qahramoni Farhod Soyibov, “O‘zbekiston Respublikasida xizmat ko‘rsatgan sanoat xodimi” faxriy unvoni sohiblari Yuldash G‘aniyev, Karim Samatov, Sayfiddin Bahronov, “Mehnat shuhrati” ordeni sohibi Elmurad Xalikulov, “Do‘stlik” ordeni sohiblari Sanam Abdullayeva, Andrey Kuleshov, “Shuhrat” medali sohiblari Feruza Karimova, Zohiddin Bobayev, Ixtiyor Usmonov, “Kelajak bunyodkori” medali sohibi Ulug‘bek Quvondiqov, “Mard o‘g‘lon” Davlat mukofoti sohibi Davron Namozov va boshqalar shular jumlasidandir. Ular izidan munosib shogirdlar, yosh mutaxassisu rahbarlar yetishib kelayotgani quvonarlidir, albatta. Farhod Cho‘liyev, Hamid Kenjayev, Sardor Polvonov, Andrey Subbotin, Sherzod Kamolov, Saodat Boboyorova, Ulug‘bek Ernazarov, Zafar Sharipov va boshqa yoshlarni misol keltirish mumkin. Bugun ular o‘zlariga bildirilgan ishonchni har tomonlama oqlab kelishayapti. Shunday bilimli, Vatanga sadoqatli yoshlarimiz ko‘paysa, kombinat kelajagi ishonchli qo‘llarda bo‘lishi muqarrar.

Hozirda nafaqat ishlab chiqarish, balki ishchi-xodimlarimizning ijtimoiy himoyasi, yashash sharoitlarini yaxshilash ham diqqat-markazimizda. Keyingi yillarda ko‘rilgan chora-tadbirlar tufayli konchilar maskani – Zarafshon shahrida xizmat ko‘rsatish, ijtimoiy va kommunal sohalarda jiddiy ijobiy o‘zgarishlar yuz berdi. Kombinat tomonidan 504 o‘rinli ixtisoslashtirilgan maktab-internati, imkoniyati cheklangan bolalar uchun “Umid” maktabgacha ta’lim tashkiloti, “Favvoralar sayilgohi”, akvapark, sport majmuasi, Ishchilar shaharchasi, mini stadionlar va boshqa shu kabi bunyodkorlik ishlari amalga oshirilgani bunga yaqqol misol bo‘la oladi. Bugun bu inshootlar, bo‘linmalarda olib borilgan obodonlashtirish va ko‘kalamzorlashtirish ishlari, ayniqsa, hamkasblarimiz o‘z qo‘llari bilan yaratgan bog‘-rog‘lar tarovatidan ko‘ngillar yayraydi, havas va hayratga tushamiz. Biz, bundan keyin ham Zarafshon shahri aholisi uchun ijtimoiy ahamiyatga molik binolarni qurib berishga tayyormiz.

Hali oldimizda juda katta marralar turibdi. Sizlar bilan birgalikda 2030-yilgacha kombinatni barqaror rivojlantirish dasturini amalga oshirishimiz zarur. Bu yo‘lda fidoiylik ko‘rsatishlaringizga ishonaman.

Fursatdan foydalanib, sizlarni yana bir bor qutlug‘ sana bilan chin qalbimdan tabriklayman.

Sizlarga sog‘lik-salomatlik, oilaviy tinchlik-xotirjamlik, xonadonlaringizga fayzu baraka tilayman!

Yubileylar barchangizga muborak bo‘lsin!

Quvondiq SANAQULOV,

“Navoiy kon-metallurgiya kombinati” AJ

Boshqaruvi raisi – Bosh direktori.