Navoiy kon-metallurgiya kombinatida ishchi-xodimlar malakasini oshirish va qayta tayyorlash, ularning nazariy va amaliy bilimlari, mahoratlarini oshirish bo‘yicha tizimli ishlar olib borilmoqda.

Yaqinda “NKMK” AJning Navoiy shahrida joylashgan O‘quv markazida kombinat boshqarmasi, “Qizilqum” kon boshqarmasi, Navoiy mashinasozlik zavodi vakillari uchun “Avtogidroko‘targich va teleminoralarda ishlashga ruxsat berish” mavzusida ochiq dars o‘tkazildi.

– Ochiq darsda tinglovchilarga avtogidroko‘targichlar tasnifi, tuzilishi va ularda xavfsiz ishlash qoidalari, ishlashda yuzaga kelishi mumkin bo‘lgan noxush hodisalar hamda avariya holatida qanday harakatlanish kerakligi to‘g‘risida tushunchalar berildi. Nazariy va amaliy jarayonlar uyg‘unligida o‘tgan mashg‘ulotda tinglovchilar mavzuga doir videolavha va slaydlar orqali batafsil tushunchaga ega bo‘lishdi, – deydi O‘quv markazi kadrlar tayyorlash bo‘yicha muhandisi Lola Kenjayeva.

70620242

Interfaol usulda o‘tkazilgan ochiq dars jarayoni savol-javoblarga boy bo‘ldi. O‘quv markazida o‘tkazilayotgan o‘quv kurslari, seminar va ochiq darslar tinglovchilar bilimini yanada mustahkamlashga xizmat qilmoqda.

“NKMK” AJ Matbuot xizmati.