Navoiy kon-metallurgiya kombinati yangi kon-transport va texnologik uskunalar, ilg‘or texnologiyalar bilan jihozlantirilgan gidrometallurgiya zavodlariga ega zamonaviy sanoat klasteridir. Kombinatda sifat menejmenti, mehnatni muhofaza qilish, atrof-muhit va energetika menejmenti tizimlarining xalqaro standartlar talablari asosida ishlashi korxona faoliyati samaradorligini oshirishga xizmat qilmoqda.

2005-yildan boshlab, 21 ming nafardan ortiq ishchi-xodim mehnat faoliyatini olib borayotgan, ishlab chiqarish ko‘rsatkichlari bo‘yicha kombinatning eng yirik bo‘linmasi – Markaziy kon boshqarmasida ISO xalqaro standartlariga muvofiq integratsiyalashgan menejment tizimi joriy etilgan bo‘lib, undan samarali foydalanilmoqda. 2005-yildan buyon har uch yilda bir marta xalqaro sertifikatlashtirish organi tizimning samaradorligini baholab, uning xalqaro darajadagi sertifikatlarga muvofiqligini tasdiqlamoqda.

Joriy yilda “NKMK” AJ Markaziy kon boshqarmasi yana bir bor navbatdagi sertifikatlashdan muvaffaqiyatli o‘tib, korxona faoliyatining ISO 9001:2015 (“Sifat menejmenti tizimi”), ISO 14001:2015 (“Atrof-muhit menejmenti tizimi”), ISO 45001:2018 (“Sog‘liqni muhofaza qilish va mehnat xavfsizligi menejmenti tizimi”), ISO 50001:2018 (“Energetika menejmenti tizimi”) xalqaro standartlari talablariga muvofiqligi tasdiqlandi. Kon boshqarmasi faoliyatini mahsulotning yuqori sifati, sog‘liqni muhofaza qilish va mehnat xavfsizligi, energiya samaradorligi va atrof-muhit muhofazasini taʼminlash orqali amalga oshiradi. Integratsiyalashgan menejment tizimining ishlashi zamonaviy texnologiyalar asosida yangi gidrometallurgiya zavodlarini qurish bo‘yicha yirik investitsion loyihalarini amalga oshirishda samaradorlikka erishishga xizmat qilmoqda.

Mazkur xalqaro sertifikatlar Toshkent shahrida o‘tkazilgan O‘zbekiston va Tojikiston iqtisodiyotining turli tarmoqlaridan yetakchi korxonalar, tegishli davlat organlari, muassasa va tashkilotlari vakillarining “ISO xalqaro standartlari bo‘yicha sertifikatlash – barqaror rivojlanish va ishlab chiqarilayotgan mahsulotlar eksportini oshirish omili” mavzusida “Bureau Veritas Tashkent” kompaniyasi tomonidan tashkil etilgan biznes uchrashuvida topshirildi. Tadbirda “NKMK” AJ Markaziy kon boshqarmasi vakillari ishtirok etdi.

Biznes uchrashuvi ishtirokchilari bugungi kunda ISO xalqaro standartlari bo‘yicha sertifikatlash, barqaror rivojlanish va ijtimoiy masʼuliyat masalalari nafaqat korxonalar, mamlakatlar, balki butun jahon iqtisodiyoti manfaatlari markazida ekanligini taʼkidladilar. Globallashuv kuchayib borayotgan va mahsulot sifatiga talablar ortib borayotgan sharoitda bunday sertifikatlarning mavjudligi muvaffaqiyatli biznesning muhim qismiga aylanib bormoqda va xalqaro bozorlarda raqobatbardoshlikni oshirish va eksport hajmini oshirishning asosiy vositasi hisoblanadi.

“NKMK” AJ Matbuot xizmati.