Navoiy kon-metallurgiya kombinatida kadrlar tayyorlash, ularni qayta o‘qitish, malakasini oshirish bo‘yicha barcha zarur shart-sharoitlar va imkoniyatlar, mustahkam baza yaratilgan va bu tizim zamon talablariga mos ravishda takomillashtirilib borilayotir.

Kombinatga muhandis kadrlarni tayyorlab berish bo‘yicha oliy taʼlim muassasalari bilan hamkorlik tizimli yo‘lga qo‘yilgan. Ishlab chiqarish korxonalari uchun zarur bo‘lgan muhandis kadrlarni tayyorlash bo‘yicha kombinatda istiqboldagi rejalar belgilandi.

Jumladan, kombinat bo‘linmalarini yuqori malakali mutaxassislar va kadrlar zaxiralari bilan taʼminlash maqsadida Navoiy davlat konchilik va texnologiyalar universiteti, Toshkent davlat texnika universiteti, Geologiya fanlari universiteti, Toshkent axborot-texnologiyalari universiteti, Toshkent davlat transport universiteti va boshqa qator oliy taʼlim muassasalari bilan o‘zaro hamkorlik shartnomalari tuzilgan. Birgina, 2022-2023-yillarda ushbu oliy o‘quv yurtlari talabalarining 912 nafari amaliyot o‘tashgan bo‘lsa, 2023-2024-yillarda esa 860 nafari kombinat korxonalarida amaliyot o‘tashmoqda.

140620242

Shuningdek, Zarafshon sanoat texnikumi, Uchquduq sanoat texnikumi, hamda Navoiy shahrida faoliyat olib borayotgan “Ishga marhamat!” Monomarkazi bilan mustahkam aloqalar yo‘lga qo‘yilgan va bu hamkorlik kombinatga yosh kadrlarni tayyorlab bermoqda. Joriy yilda Zarafshon sanoat texnikumining 95 nafar o‘quvchisi Markaziy kon boshqarmasida, Uchquduq sanoat texnikumi o‘quvchilarining 100 nafari Shimoliy kon boshqarmasida amaliyot o‘tashmoqda.

Oliy taʼlim – ilm-fan – ishlab chiqarish to‘la integratsiyalashtirilgani, nazariya va amaliyot yaxlitligi, talabalar malakaviy amaliyotlarini bevosita ishlab chiqarish korxonalarida o‘tkazayotgani bitiruvchilarning tayyor mutaxassis bo‘lib chiqishiga zamin yaratmoqda.

“NKMK” AJ Matbuot xizmati.