2024-yil 27-iyun kuni O‘zbekiston Respublikasi Prezidentining “Yoshlar kuni munosabati bilan yurtimizning faol va tashabbuskor yosh avlod vakillaridan bir guruhini mukofotlash to‘g‘risida”gi farmoni imzolandi.

Mazkur farmonga muvofiq, mamlakatimizda yosh avlodni qo‘llab-quvvatlash, ularning davlat va jamiyat hayotidagi faolligini oshirish maqsadida o‘zining yuksak azmu shijoati, bilim va salohiyati, isteʼdod va qobiliyatini namoyon etib, turli sohalarda erishgan yutuqlari bilan Yangi O‘zbekiston taraqqiyotiga, uning shon-shuhratini jahon miqyosida yanada yuksaltirishga munosib hissa qo‘shayotgan, el-yurtimizga mehri va sadoqati, namunali xulqi va odobi hamda vatanparvarlik fazilatlari bilan tengdoshlariga har tomonlama o‘rnak bo‘lib kelayotgan bir guruh tashabbuskor va yetakchi yoshlar “Kelajak bunyodkori” medali bilan taqdirlandi.

Taqdirlanganlar orasida “Navoiy kon-metallurgiya kombinati” aksiyadorlik jamiyati vakili ham borligi biz uchun alohida quvonarlidir. “Navoiy mashinasozlik zavodi” ishlab chiqarish birlashmasi kran mashinisti Sevinch Saidova “Kelajak bunyodkori” medali bilan mukofotlandi.

Hamkasbimizni yuksak davlat mukofoti bilan tabriklaymiz!

“NKMK” AJ Matbuot xizmati.