Poster 30-iyun

Sizlarni bugungi qutlug‘ bayram – Yoshlar kuni bilan chin qalbdan samimiy tabriklayman.

Davlatimiz rahbari rahnamoligida mamlakatimiz yoshlari huquq va manfaatlarini taʼminlash, bilim olishi, mehnat qilishi, o‘z qobiliyat va isteʼdodini ro‘yobga chiqarishi uchun barcha sharoitlar yaratib berilmoqda. Bundan oqilona foydalangan yoshlarimiz turli sohalarda ijobiy natijalarni qo‘lga kiritayotgani barchamizni xursand etmoqda.

Zero, Sizlar kabi fidoiy yoshlarimiz yurtimiz va kombinatimizning bebaho boyligidir. Buning uchun yurtga har qanday marrani egallashga qodir, azmu shijoatli, mehr va sadoqatli, namunali xulq va vatanparvar yoshlar, munosib vorislar, davomchilar kerak. Sizlar shunday masʼuliyatni zimmangizga olishlaringizga ishonaman.

Bayram arafasida yoshlar siyosati sohasidagi ishlar sarhisobi, yangi vazifa va takliflar muhokamasiga bag‘ishlangan yig‘ilishda muhtaram Yurtboshimizning yoshlarimizga bo‘lgan eʼtibori, g‘amxo‘rligiga o‘zingiz yana bir karra guvoh bo‘ldingiz. Ushbu tarixiy uchrashuv kelajak avlodlarimiz qalbida ona-Vatanga daxldorlik hissi, Yangi O‘zbekiston bunyodkori bo‘laman, yurtim taraqqiyotiga o‘z hissamni qo‘shaman, degan tuyg‘uni yanada kuchaytirgani, hayotingizga yangicha mazmun olib kirgani tabiiy.

Navoiy kon-metallurgiya kombinatida yoshlar 12 ming nafarni tashkil etadi. Kombinatimiz yoshlari bugungi kunda keyingi yillarda barpo etilgan yangi zamonaviy zavodlarni ishonch bilan boshqarmoqda, ishlab chiqarishning barcha jabhalarida o‘zlarining bilim va isteʼdodlarini ko‘rsatib, innovatsion va ratsionalizatorlik g‘oyalari bilan faol bo‘lishmoqda. Sizlardagi ishonch va shijoat doimo bardavom bo‘lsin.

Yana bir bor barchangizni Yoshlar kuni bilan muborakbod etib, sizlarga mustahkam sog‘lik, oilaviy baxt-saodat, kelgusi ishlaringizda yutuq va omadlar tilayman.

Quvondiq SANAQULOV,

“Navoiy kon-metallurgiya kombinati” AJ

Boshqaruvi raisi – Bosh direktori.