So‘nggi yillarda mamlakatimizda yoshlarni qo‘llab-quvvatlash bo‘yicha yangi tizim yaratildi. Bilimli, keng dunyoqarashga ega yigit-qizlarni vatanparvarlik ruhida tarbiyalash davlat siyosatining ustuvor vazifalaridan biri etib belgilandi. Buning natijasida bugungi kun yoshlari ijtimoiy-iqtisodiy taraqqiyotning faol ishtirokchisi, yangi g‘oyalar tashabbuskori bo‘lib maydonga chiqmoqda.

Navoiy kon-metallurgiya kombinatida yoshlarga oid davlat siyosatini amalga oshirishga qaratilgan chora-tadbirlar dasturi va “30 iyun – Yoshlar kuni” munosabati bilan joriy yilning 29-iyun kuni Navoiy shahrida kombinat yoshlari o‘rtasida sport o‘yinlari hamda qator madaniy-maʼrifiy tadbirlar bo‘lib o‘tdi.

7 (2)

– Kombinat bo‘linmalarida faoliyat yuritayotgan O‘zbekiston yoshlar ittifoqi boshlang‘ich tashkilotlarining 110 nafar yetakchisi, ular masʼulligidagi 12 ming nafarga yaqin yosh rahbar va malakali mutaxassislar faoliyat olib borayotgani bizning katta kuch ekanligimizni anglatadi, – deydi NKMK yoshlar yetakchilari Kengashi raisi Sanjar Rajabov. – Buning amaldagi ifodasini kombinatimiz yoshlari hayotida ham yaqqol namoyon bo‘layapti. Yoshlar kunida tashkil etilgan bu kabi tadbirlar yoshlarning bo‘sh vaqtlarida sanʼat va sport bilan shug‘ullanishlari, kitobxonlik, AKT texnologiyalaridan samarali foydalanishlari hamda tadbirkorlik ko‘nikmalarini yuzga chiqardi. O‘ylaymanki, ushbu tadbirlarda yoshlarimiz tashabbuskor va iqtidorli ekanliklarni amalda isbotladilar.

“So‘g‘diyona” sport saroyida “Mini-futbol” sport turi bo‘yicha “NKMK kubogi” turnirining final bosqichida “Qizilqum” kon boshqarmasi jamoasi faxrli 1-o‘rinni qo‘lga kiritdi va kubok sohibi bo‘ldi.O‘sha kuni shuningdek, “Zakovat” intellektual o‘yini, “Kibersport”, “Voleybol” sport turi bo‘yicha “NKMK Kubogi” final bosqichi g‘oliblari aniqlandi.

7 (3)

“Farhod” madaniyat saroyida bo‘lib o‘tgan “Quvnoqlar va zukkolar” ko‘rik-tanlovi yoshlarni yana-da faol bo‘lishga, bor mahoratlarini namoyish etishga imkon berdi. Ko‘tarinki ruhda tashkil etilgan tadbir kombinat yoshlarini bir maqsad sari yana-da faol bo‘lishga chaqirdi.

Navoiy mashinasozlik zavodi jamoasi sportning “voleybol” hamda “Zakovat” intellektual o‘yinida birinchi o‘ringa davogarlik qilgan bo‘lsa, “Kibersport” musobaqasida Shimoliy kon boshqarmasi jamoasi g‘oliblikni qo‘lga kiritdi. “Quvnoqlar va zukkolar” ko‘rik-tanlovida esa Markaziy kon boshqarmasi jamoasi barchadan ustunligini amalda isbotladi.

7 (4)

Yakunda “NKMK kubogi” uchun tashkil etilgan “Zakovat” intellektual turniri, “Quvnoqlar va zukkolar” ko‘rik-tanlovi hamda sport musobaqalari g‘oliblarini taqdirlash marosimi bo‘lib o‘tdi.

Azamat ZARIPOV.