4-iyul kuni “NKMK” AJ boshqarmasida Navoiy kon-metallurgiya kombinatida 2022-2024-yillarga mo‘ljallangan Jamoa shartnomasi majburiyatlarining 2023-yilda bajarilishiga bag‘ishlangan konferensiyasi bo‘lib o‘tdi.

Kun tartibida “NKMK” AJ Maʼmuriy masalalar bo‘yicha direktor N.Jo‘libekov hamda NKMK xodimlari kasaba uyushmasi Kengashi raisi I.Rahmatovlarning kombinatda amaldagi Jamoa shartnomasi majburiyatlarining 2023-yilda bajarilishi yuzasidan hisobotlari tinglandi.

Maʼruzalarda Jamoa shartnomasida belgilangan vazifalarning bajarilish holati, ijtimoiy, iqtisodiy sohalarda olib borilgan ishlar, qo‘lga kiritilgan natijalar, istiqboldagi rejalar haqida so‘z yuritildi.

40720243

Shundan so‘ng, bosh direktorning xodimlar va maʼmuriy masalalar bo‘yicha o‘rinbosari Q.Taparovning Jamoa shartnomasi majburiyatlarining 2023-yilda bajarilishini tekshirish, Jamoa shartnomasiga o‘zgartirish va qo‘shimchalar kiritish, shuningdek, Mehnat muhofazasi, sanoat xavfsizligi va ekologiya bo‘yicha direktor A.Cherdansevning 2023-yilda mehnat muhofazasi bo‘yicha kelishuvning bajarilishi va 2024-yil uchun mehnat muhofazasi bo‘yicha kelishuvni qabul qilish to‘g‘risidagi axborotlari eshitildi.

Muzokaralarda Markaziy kon boshqarmasi Temir yo‘l transporti boshqarmasi teplovoz mashinisti M.Komilov, Shimoliy kon boshqarmasi Nazorat-o‘lchov asboblari va avtomatika markaziy laboratoriyasi muhandisi Yu.Sabirova, 4-gidrometallurgiya zavodi bosh muhandisi N.Hayitovlar o‘z fikr-mulohazalari bilan chiqish qildi.

40720247

Yakuniy qarorga ko‘ra, konferensiya delegatlari tomonidan kombinat maʼmuriyati va kasaba uyushmasi Kengashining 2023-yilda Jamoa shartnomasining bajarilishi bo‘yicha faoliyati qoniqarli, deb topildi. 2022-2024-yillarga mo‘ljallangan Jamoa shartnomasi qo‘shimcha va o‘zgartirishlar bilan bir ovozdan qabul qilindi.

“NKMK” AJ Matbuot xizmati.