“NKMK” AJda transformatsiya bo‘yicha Boshqaruv kengashining 2024-yil 2-chorak yakunlari muhokamasiga bag‘ishlangan navbatdagi yig‘ilishi bo‘lib o‘tdi.

Tadbirda oldingi yig‘ilishda qabul qilingan qarorlar natijalari hamda transformatsiyaning operatsion samaradorlik, raqamlashtirish, tashkiliy rivojlanish, barqaror rivojlanish (ESG) kabi asosiy yo‘nalishlari bo‘yicha hisobotlar tinglandi.

Shuningdek, yig‘ilishda kombinat mutaxassislari va Boston Consulting Group (BCG) kompaniyasi vakillari ishtirokida Shimoliy kon boshqarmasida amalga oshirilgan qo‘shma chora-tadbirlar, jumladan, asosiy jarayonlarni tezkor boshqarishda raqamli yechimlarni joriy etish va ishlab chiqarish ko‘rsatkichlarining shaffofligini oshirish bo‘yicha amalga oshirilgan ishlar natijalari taqdim etildi.

Kun tartibida “Uzassets” AJ tomonidan taqdim etilgan “Aksiyadorning kutilmalari” doirasida “NKMK” AJda amalga oshirilishi lozim bo‘lgan yangi chora-tadbirlarning ustuvor yo‘nalishlari belgilandi.

Bugungi kunda amalga oshirilayotgan barcha chora-tadbirlar ishlab chiqarish hajmini oshirish, resurslardan samarali foydalanish, ilg‘or xalqaro tajribani joriy etish, investitsiya jozibadorligini oshirish va kombinatning jahon miqyosida yetakchi oltin ishlab chiqaruvchi kompaniyalardan biri sifatida tan olinishini taʼminlashga qaratilgan.

Boshqaruv kengashi – “NKMK” AJ transformatsiyasi maqsadi va vazifalarini belgilash, strategiyasini shakllantirish va tasdiqlash hamda uning doirasidagi loyihalarni amalga oshirish, shuningdek, transformatsiya ishlari natijalarini baholash va qabul qilishga masʼul bo‘lgan maxsus tashkil etilgan organ.

Boston Consulting Group (BCG) – boshqaruv konsaltingiga ixtisoslashtirilgan xalqaro kompaniya.

“NKMK” AJ Matbuot xizmati.