Bugun kombinat boshqarmasida “Navoiy kon-metallurgiya kombinati” AJ rahbariyati va “O‘zbekiston temir yo‘llari” AJ delegatsiyasi vakillari o‘rtasida uchrashuv o‘tkazildi.

Kombinatda oltin tarkibli maʼdanni konlardan gidrometallurgiya zavodlariga tashish, mahalliy va xorijiy ishlab chiqaruvchilardan tovar-moddiy boyliklarni NKMK bo‘linmalariga yetkazib berish jarayoni asosan temir yo‘llari orqali amalga oshiriladi.

Shu bois, birinchi navbatda, uchrashuv davomida “NKMK” AJ Boshqaruvi raisi – Bosh direktori Q.Sanaqulov va “O‘zbekiston temir yo‘llari” AJ Boshqaruvi raisi Z.Narzullayevlar tomonidan temir yo‘l transporti xizmatlari ko‘rsatishni yaxshilash, vagonlar aylanmasini tezlashtirish, hamkorlikni yanada rivojlantirish istiqbollari to‘g‘risida so‘z yuritildi.

Shuningdek, tomonlarda mavjud mashinasozlik korxonalari negizida ehtiyot qismlar va butlovchi buyumlar ishlab chiqarish bo‘yicha kooperatsiya, mahalliylashtirish va tajriba almashish masalalari muhokama etildi.

“NKMK” AJ Matbuot xizmati.