“Navoiy kon-metallurgiya kombinati” aksiyadorlik jamiyati (“NKMK” AJ) 2025-yil birinchi yarim yillik uchun moliyaviy hisobotning xalqaro standartlari bo‘yicha moliyaviy natijalarni e’lon qiladi.

Asosiy faktlar

2025-yil 1-yarim yillikda oltin ishlab chiqarish 1,54 mln. troy unsiyani tashkil etib, bu ko‘rsatkich 2024-yilning 1-yarim yilligiga (1,52 mln. troy unsiya) nisbatan 1,3 foizga oshdi. Bunga ma’dan qazib olish va qayta ishlash hajmlarining oshishi hisobiga erishildi.
2025-yil 1-yarim yillikda sof tushum 4 715 mln. AQSh dollarini tashkil etib, bu ko‘rsatkich 2024-yilning mos davriga (3 346 mln. AQSh dollari) nisbatan 40,9 foizga oshdi. O‘sish qulay bozor konyunkturasi (LBMA narxi) va sotish hajmining ko‘payishiga bog‘liq.
2025-yil 1-yarim yillikda ishlab chiqarish va qo‘llab-quvvatlash bo‘yicha umumiy pul xarajatlari (AISC) bir troy unsiya uchun 1 164 AQSh dollarini tashkil etdi, 2024-yilning 1-yarim yilligida bu ko‘rsatkich 907 AQSh dollarini tashkil etgan. Xarajatlarning o‘sishi kutilganidek bo‘ldi va asosan oltin narxlarining ko‘tarilishi natijasida royalti to‘lovlarining oshishi hamda tog‘ jinslarini qazib olish hajmining ko‘payishi bilan bog‘liq edi.
2025-yil 1-yarim yillikda moslashtirilgan EBITDA ko‘rsatkichi 3 060 mln. AQSh dollariga yetdi, bu 2024-yilning mos davridagi 2 017 mln. AQSh dollaridan 51,7 foizga yuqori. Oltin narxining o‘sishi va sotuv hajmlarining oshishi xarajatlarning ortishini qoplab, moslashtirilgan EBITDA marjasining 64,9 foizgacha oshishiga olib keldi (2024-yilning 1-yarim yilligida – 60,3 foiz).
2025-yil 1-yarim yillikda investitsion faoliyatga yo‘naltirilgan sof pul mablag‘lari (kapital xarajatlar) 412 mln. AQSh dollarini tashkil etib, bu ko‘rsatkich 2024-yilning mos davridagi 298 mln. AQSh dollariga nisbatan 38,3 foizga oshdi. O‘sish Kompaniyaning amaldagi konlarda ishlab chiqarish quvvatlarini kengaytirish va ularga yaqin hududlarda yangi konlarni qidirishga qaratilgan investitsiya dasturi ijrosini davom ettirish bilan bog‘liqdir.
Kompaniyaning qarz yuklamasi koeffitsiyenti (sof qarzning moslashtirilgan EBITDA^TTM ga nisbati) 2024-yilning 1-yarim yiligidagi 0,6x dan 2025-yilning 1-yarim yilligida 0,5x gacha yaxshilandi, bu esa Kompaniyaning moliyaviy intizomi saqlanib qolayotganini tasdiqlaydi. 2025-yil 30-iyun holatiga ko‘ra, NKMKning qarz portfeli tarkibiga 2024-yil oktabr oyida muvaffaqiyatli amalga oshirilgan 1 mlrd. AQSh dollari miqdoridagi ilk xalqaro obligatsiyalar emissiyasi (to‘rt va yetti yillik muddat bilan ikkita 500 mln. dollarlik transh) hamda 2025-yil may oyida joylashtirilgan 500 mln. AQSh dollari miqdoridagi xalqaro obligatsiyalar kiradi.

PRESS-RELIZ

“NKMK” AJ Matbuot xizmati