2-gidrometallurgiya zavodi Navoiy kon-metallurgiya kombinatining oltin tarkibli maʼdan qayta ishlash va mahsulot ishlab chiqarish quvvati jihatidan eng yirik korxonasi hisoblanadi.

Keyingi yillarda zavodda qimmatbaho metallar ishlab chiqarish hajmini oshirishga qaratilgan investitsion loyihalar amalga oshirildi. Joriy yilda ham 2-GMZda maʼdan qayta ishlash quvvatini oshirish, asbob-uskunalarni modernizatsiyalash bo‘yicha ishlar davom ettirilmoqda. Xususan, sorbsiya va regeneratsiya sexida qo‘shimcha 30 ta sorbsion uskunalari va quyultirish sexida qo‘shimcha 2 ta quyultirgich qurish, 16-nasos stansiyasini rekonstruksiya qilish, maydalash sexining ikkinchi binosini kengaytirish va ushbu sexning ikkinchi navbati loyihasi asosida 33-tegirmon blokini montaj qilish ishlari olib borilmoqda.

Taʼkidlash joizki, texnologik jarayonlar uchun zarur asbob-uskuna va ehtiyot qismlar mahaliylashtirilib, Navoiy mashinasozlik zavodi hamda Zarafshon taʼmirlash-mexanik zavodida tayyorlanyapti. Qurilish ishlari Zarafshon qurilish boshqarmasi tomonidan amalga oshirilmoqda.

Uch ming nafardan ortiq ishchi-xodim faoliyat olib borayotgan zavodning ishlab chiqarish jarayonlari to‘liq raqamlashtirilgan. Bu ishlab chiqarishni muntazam kuzatib borish, tejamkorlikka erishish, ish surʼatini yana-da oshirishni taʼminlamoqda.

“NKMK” AJ Matbuot xizmati.