2025-yilda “Navoiy kon-metallurgiya kombinati” AJ tomonidan Mahalliylashtirish dasturi doirasida 1,4 trln. so‘mlik mahalliylashtirilgan mahsulot ishlab chiqarilib, 2024-yilga nisbatan o‘sish sur’ati 153,6 foizni tashkil etdi.

Mazkur dastur doirasida yangi o‘lchamdagi maydalash tegirmonlari (MShTs 5,5x8,5m o‘lchamdagi, qayta ishlash hajmi 180 tn/soat), quyiltirgichlar, masofadan boshqariladigan avtomatlashtirish shkaflari, turli hil nostandart uskunalar (maʼdan oziqlantiruvchi, konveyer, Gekko reaktori, BIOX reaktorlari), “Komatsu PC-2000” ekskavatori va “LW-1200” frontal yuklagichlari uchun yig‘ma kovsh mahsulotlari, yangi turdagi nasoslar va boshqa shu kabi mahsulotlar mahalliylashtirildi.

O‘tgan yilda kombinat tomonidan Mahalliylashtirish dasturi doirasida yangi turdagi yirik maydalash tegirmonlari, dozalash nasoslari, havo-chang zarralarini tortish uskunalari, issiqlik almashinuv uskunalari, yangi turdagi ekskavatorlar uchun butlovchi va ehtoyot qismlari kabi mahalliylashtirilgan mahsulotlar ishlab chiqarildi.

Tarmoqlararo sanoat kooperatsiyasi doirasida mahalliy ishlab chiqaruvchilardan 7,3 trln. so‘mlik mahsulot xarid qilish bo‘yicha hamkorlik shartnomalari tuzilib, 2024-yilga nisbatan o‘sish sur’ati 117 foizni tashkil etdi. Kombinat ishlab chiqarish ehtiyojlari uchun mahalliy korxonalar quvvatlarida 100 dan ortiq yangi turdagi mahsulot o‘zlashtirildi.

So‘nggi yillarda ishlab chiqarish ehtiyojlari uchun oldin chetdan olib kelingan hamda doimiy talabga ega bo‘lgan ko‘plab mahsulotlar mahalliy sanoat korxonalari bilan yaqin hamkorligi natijasida mahalliy ishlab chiqaruvchi korxonalar quvvatlarida o‘zlashtirish orqali importni qisqartirishga erishilmoqda.

“NKMK” АJ tomonidan 2025-yilda mahalliy korxonalarni shatakka olish orqali kombinat ehtiyojlari uchun 783 mlrd. so‘mlik sanoat mahsulotlari o‘zlashtirish bo‘yicha hamkorlik shartnomalar tuzildi. Xususan, o‘tgan yilda mahalliy korxonalar quvvatlarida kon-shaxta jihozlari, reduktorlar, nasoslar va ehtiyot qismlar, termoelektrik o‘zgartirgich, elektrodvigatellar va uskunalar, avtomatik tizimlarni o‘rnatish ishlari va xizmatlari, ftoroplast va polimer mahsulotlar va boshqa shu kabi import o‘rnini bosuvchi mahsulotlar o‘zlashtirildi.

“NKMK” AJ Matbuot xizmati