“O‘zbekiston – 2030” strategiyasini “Atrof-muhitni asrash va “yashil iqtisodiyot” yili”da amalga oshirishga oid Davlat dasturini bajarish yo‘lida Navoiy kon-metallurgiya kombinatida ham aniq rejalar belgilab olingan. Jumladan, ulkan jamoa tomonidan joriy yilda 14 ta bo‘lim va 32 ta banddan iborat chora-tadbirlar bajarilishiga 46,6 mlrd. so‘m va 13,2 mln. AQSh dollar sarflanishi ko‘zda tutilgan.

Mazkur hujjatda kombinatga ham bir qator vazifalar yuklangan. Jumladan, Davlat dasturining 4-ilovasi 8-bandida “NKMK” AJ tomonidan ESG hisobotlarini yuritish amaliyotini yo‘lga qo‘yish va jamoatchilikka oshkor etish, ESG-reytingini olish hamda 12-bandida “Muruntov” konini o‘zlashtirish investitsiya loyihasining navbatdagi bosqichlarini amalga oshirish belgilangan.

2025-yilning fevral oyida kombinatga “Sustainable Fitch” xalqaro reyting agentligi tomonidan ilk bor korporativ ESG-reytingi berildi va O‘zbekiston tog‘-kon sanoatida ESG-reytingini olgan birinchi kompaniya bo‘ldi. Bu, kompaniyaning sohadagi yetakchiligi, barqaror rivojlanish tamoyillariga rioya qilishi hamda ekologik, ijtimoiy va korporativ boshqaruv omillarining faoliyatga qanchalik integratsiya qilinganligini to‘la aks ettiradi.

Shuningdek, kombinat chora-tadbirlar dasturida ekologik masalalarga alohida eʼtibor qaratilgan bo‘lib, atrof-muhitni asrash, yashil maydonlarni kengaytirish, qayta tiklanuvchi energiya manbalaridan foydalanish kabi dolzarb yo‘nalishlar o‘z aksini topgan. Buning bir misoli sifatida aytish mumkinki, ko‘chat ekish, bog‘ yaratish, obodonlashtirish, korxonalar va sanoat zonalari atrofini “yashil belbog‘”lar bilan ko‘kalamzorlashtirish ishlari ommaviy harakatga aylandi.

- Bu yilgi bahor mavsumida kombinat ishchi-xodimlari ishtirokida “Yashil makon” umummilliy loyihasi doirasida hudud tuproq va iqlimiga mos 21 turdagi 300 ming tupdan ortiq manzarali va mevali daraxt hamda buta ko‘chatlari ekildi. Bundan tashqari, kombinat ko‘magida bir qator hududlarda yashil belbog‘lar va bog‘lar barpo etildi, - deydi “NKMK” AJ korporativ ijtimoiy masʼuliyatlar bo‘limi boshlig‘i Bekzod Saidov.

Xususan, 1-gidrometallurgiya zavodining chiqindi saqlash ombori sanitar himoya hududi, 3-gidrometallurgiya zavodi hududi, kombinat ko‘magida Karmana tumani hududidan o‘tuvchi M-37 avtomobil yo‘li atrofi, G‘ozg‘on shahridagi “Marmarobod” mahalla fuqarolar yig‘ini, Nurota tumani “Yangibino” MFY hududlarida bog‘lar, yashil belbog‘lar tashkil etilib, bunda, ishchi-xodimlar bilan birga, yoshlar vakillari ham faol ishtirok etishdi.

Bir so‘z bilan aytganda, bugun kombinat jamoasi tomonidan “Atrof-muhitni asrash va “yashil iqtisodiyot” yili”da belgilangan vazifalar ijrosi o‘z vaqtida bajarilishi uchun barcha imkoniyatlar mavjud.

“NKMK” AJ Matbuot xizmati.