Oldin xabar berganimizdek, Navoiy kon-metallurgiya kombinatining ishlab chiqarish ko‘rsatkichlari bo‘yicha eng yirik korxonasi – 2-gidrometallurgiya zavodida joriy yilda ham maʼdan qayta ishlash va mahsulot ishlab chiqarish quvvatlarini oshirishga qaratilgan qurilish ishlari davom etmoqda.

Bugungi kunda zavodda asbob-uskunalarni modernizatsiyalash, maydalash sexining ikkinchi binosini kengaytirish, 35-tegirmon blokini montaj qilish hamda sorbsiya sexida qo‘shimcha 30 ta sorbsion uskunani barpo etish ishlari amalga oshirilmoqda.

- Zavodning sorbsiya sexidagi texnologik jarayonlar orqali maʼdandan qimmatbaho metall yuqori darajada ajratib olinadi. Sexda texnologik zanjirlarning ishlashi natijasida bir sutka davomida 200 ming kubometr bo‘tana qayta ishlanib, oltin ajratib olinmoqda. Sorbsiya sexida barpo etilayotgan sorbsion uskunalar to‘la quvvatda ishga tushirilishi kelgusida zavodda maʼdanni qayta ishlash hajmini yiliga 4 million tonnaga oshirish imkonini beradi, - deydi Markaziy kon boshqarmasi texnologik xizmati boshlig‘i Baxtiyor Razoqov.

Texnologik jarayonlar uchun zarur asbob-uskuna va ehtiyot qismlar mahalliylashtirilib, Navoiy mashinasozlik zavodi hamda Zarafshon taʼmirlash-mexanika zavodida tayyorlanyapti. Qurilish ishlari Zarafshon qurilish boshqarmasi tomonidan olib borilmoqda.

“NKMK” AJ Matbuot xizmati.