14-iyunda Navoiy kon-metallurgiya kombinati tomonidan mamlakatimiz mustaqilligining dastlabki yillarida barpo etilgan 3-gidrometallurgiya zavodi foydalanishga topshirilganiga 30 yil to‘ladi. So‘nggi yillarda korxonada ishlab chiqarish quvvatlarini oshirishga qaratilgan investitsion loyihalarni bosqichma-bosqich amalga oshirish bo‘yicha keng ko‘lamli ishlar bajarilmoqda.

Xususan, 2024-yilda “Qoqpatas va Dovg‘iztov oltin konlarida maʼdan qazib olish (III navbati)” investitsion loyihasi doirasida zavodda maʼdanni yillik qayta ishlash hajmini 10 mln. tonnaga yetkazish maqsadida yangi tegirmon bloklari barpo etildi. Shuningdek, Flotatsiya sexini kengaytirish ishlari amalga oshirildi. Hozirgi vaqtda maʼdanni bir sutkada qayta ishlash hajmi 25 ming tonnadan 28 ming tonnaga yetkazildi.

Joriy yilning yanvar oyida 3-gidrometallurgiya zavodi Bioksidlash sexining (BIOX) maʼdan qayta ishlash quvvatlarini oshirish va kengaytirish bo‘yicha olib borilgan ishlar natijasida yangi biooksidlash modullari ishga tushirilgan edi. Buning hisobiga jami bioreaktorlar soni 60 taga yetkazilib, sulfid konsentratlari ishlab chiqarish hajmini 25 foizga, tayyor mahsulot hajmini 12 foizga oshirish imkoni yaratildi. Taʼkidlash kerakki, Biooksidlash sexidagi bioreaktorlarning hajmi va soni bo‘yicha NKMK dunyoda “BIOX” texnologiyasi qo‘llanilayotgan korxonalar o‘rtasida yetakchi hisoblanadi.

Ushbu bioreaktorlarda ishlanishi murakkab bo‘lgan sulfidli maʼdanni bakterial oksidlash jarayoni amalga oshirilishi keyingi sorbsiya jarayonini sezilarli darajada takomillashtiradi va shunga mos ravishda qimmatbaho metallni ajratib olishni oshiradi. Bakterial oksidlash jarayoni 42±2 gradus haroratda 120 soat davom etadi. Ushbu haroratni ushlab turish uchun biorektorlarda sovutish tizimi o‘rnatilgan bo‘lib, u orqali sovutilgan suv aylanadi.

Mazkur sexda yangi biooksidlash modullari ishga tushirilganligi bois bugungi kunda kombinat mutaxassislari va quruvchilari tomonidan biorektorlardagi sovutish tizimini kengaytirishga qaratilgan qurilish ishlari olib borilmoqda. Buning natijasida bioreaktorlarda kerakli haroratni saqlab turish imkoni yaratiladi, bu esa ishlanishi murakkab bo‘lgan sulfidli maʼdanlarni oksidlashda yuqori ko‘rsatkichlarga erishish uchun muhim omil hisoblanadi.

“NKMK” AJ Matbuot xizmati