Prezidentimiz tomonidan aholining sog‘lom turmush tarzini shakllantirish, jismoniy faolligini oshirishni tashkil qilish va boshqarish mexanizmlarini takomillashtirishga qaratilgan qaror va farmonlar qabul qilinayotgani o‘z samarasini bermoqda. Jumladan, sog‘lom turmush tarzini shakllantirish, yuqumli bo‘lmagan kasalliklar va ularning xavf omillariga qarshi kurashish hamda oldini olish bo‘yicha maqsadli dastur ishlab chiqildi. Davlat va jamoat tashkilotlari bilan birgalikda sog‘lom turmush tarzini targ‘ib qilish, zararli odatlarga qarshi kurashish, aholining tibbiy madaniyatini rivojlantirish, jismoniy tarbiya-sog‘lomlashtirish va ommaviy sport harakatini tibbiyot profilaktikasi bilan integratsiyalashtirish bo‘yicha ommaviy tadbirlar o‘tkazilayapti.

Yaqinda kombinatning barcha bo‘linmalarida ishchi-xodimlar o‘rtasida sog‘lom turmush tarzini keng targ‘ib qilish hamda ommaviy sportga jalb etish maqsadida “Sog‘lom hayot uchun 5000 qadam” shiori ostida piyoda yurish marafonlari o‘tkazildi.

Navoiy shahridagi “So‘g‘diyona” o‘yingohida kombinat bo‘linmalari ishchi-xodimlari ishtirokida “Sog‘lik uchun – 5000 qadam” shiori ostida sog‘lomlashtirish tadbiri bo‘lib o‘tdi. Unda NKMK bosh direktori o‘rinbosari N.Raxmanov va NKMK kasaba uyushmalari Kengashi raisi I.Rahmatovlar bunday ommaviy sog‘lomlashtirish tadbirlari kombinat mehnatkashlari salomatligini asrashda muhim omil ekanligi haqida o‘z mulohazalarini bildirdilar.

NKMK Matbuot markazi.