Navoiy kon-metallurgiya kombinatida investitsion loyihalarni amalga oshirish doirasida yangi quvvatlarni ishga tushirish bosqichma-bosqich davom ettirilmoqda.

“Qoqpatas va Dovg‘iztov oltin konlarida maʼdan qazib olish (III navbati)” investitsion loyihasi asosida bugun 3-gidrometallurgiya zavodida yiliga 700 ming tonna oltin tarkibli maʼdanni qayta ishlash quvvatiga ega 8-maydalash tegirmoni ishga tushirildi.

- Korxonamizda yangi tegirmonlarni ishga tushirish ishlab chiqarish ko‘rsatkichlarini oshirib borishga xizmat qilmoqda. O‘tgan yili maʼdanni qayta ishlash quvvati 10 million tonnadan oshgan bo‘lsa, jamoamiz joriy yilda bu ko‘rsatkichni 10,8 million tonnaga yetkazishni rejalashtirgan, - deydi zavod bosh muhandisi Tolmas Hasanov.

Taʼkidlash joizki, mazkur maydalash tegirmoni, asbob-uskuna va ehtiyot qismlar mahalliylashtirilib, Navoiy mashinasozlik zavodida tayyorlandi. Qurilish ishlari Zarafshon qurilish boshqarmasi hamda Shimoliy kon boshqarmasi tomonidan amalga oshirildi.

Mazkur tegirmonni ishga tushirishga bag‘ishlangan tadbirda “NKMK” AJ hamda Shimoliy kon boshqarmasi rahbariyati, zavod ishchi-xodimlari ishtirok etishdi.

“NKMK” AJ Matbuot xizmati.