O‘zbekiston Respublikasi Prezidentining 2020 yil 30 oktyabrdagi “Sog‘lom turmush tarzini keng tatbiq etish va ommaviy sportni yana-da rivojlantirish chora-tadbirlari to‘g‘risida”gi farmoni talablaridan kelib chiqib, NKMK bo‘linmalari ishchi-xizmatchilari Navoiy shahridagi “So‘g‘diyona” o‘yingohida “Sog‘lom hayot uchun 5000 qadam” shiori ostida bo‘lib o‘tgan navbatdagi badantarbiya mashg‘ulotlarini bajarish, besh ming qadam yurish, shuningdek, alohida tashkil etilgan sport turlari bo‘yicha turli mashg‘ulotlarda faol ishtirok etishdi.

O‘zbekiston Respublikasi Qurolli Kuchlari tashkil topganligining 29 yilligi va Vatan himoyachilari kuni oldidan “Kim Vatanga sodiq bo‘lsa, mendirman o‘sha!” shiori ostida Navoiy shahridagi sport saroyida beshta sport turi bo‘yicha korxona ishchi-xizmatchilari o‘rtasida bellashuvlar bo‘lib o‘tdi. Ushbu tadbirlarda faol ishtirok etgan g‘oliblar, shuningdek, alohida joriy etilgan “Yoshi eng ulug‘ ishtirokchi” va “G‘alaba sari intilganligi uchun” nominatsiyalar sovrindorlari NKMK maʼmuriyati va Kasaba uyushmasi Kengashining esdalik sovg‘alari bilan taqdirlanishdi.

Bu kabi jismoniy tarbiya va sport tadbirlari Zarafshon shahridagi “Qizilqum” o‘yingohida, Uchquduq shahridagi “Lochin” o‘yingohida, Zafarobod qo‘rg‘onidagi “Yangi hayot” sog‘lomlashtirish markazida ham kombinat ishchi-xodimlari ishtirokida bo‘lib o‘tdi.

NKMK Matbuot markazi.