Joriy yilning 29-31 yanvar kunlari Navoiy kon-metallurgiya kombinatiga qarashli “Metallurg” sihatgohida kombinat bo‘linmalarida faoliyat yuritayotgan O‘zbekiston yoshlar ittifoqi boshlang‘ich tashkilotlarining 110 nafar yetakchilari uchun o‘quv-amaliy seminar bo‘lib o‘tdi.

– Seminarning asosiy maqsadi – muhtaram Yurtboshimizning 2020 yilning 25 dekabr kuni yoshlar bilan uchrashuvi hamda 29 dekabr kuni Parlamentga yo‘llagan Murojaatnomasida belgilangan yo‘nalishlarning mazmun-mohiyatini kombinatda faoliyat yuritayotgan yetakchilarga yetkazish, 2021 yilda ularning yoshlar bilan ishlashdagi vazifalarini hamda yetakchilik qobiliyatini shakllantirishda nimalarga ko‘proq eʼtibor berishini aniq belgilab olishdan iborat, – deydi NKMK yoshlar yetakchilari Kengashi raisi Sanjar Rajabov.

Seminarda yetakchilik va boshqaruv psixologiyasi, yoshlarning maʼnaviy yuksalishida yoshlar yetakchilarining o‘rni, vaqtdan unumli foydalanish va strategik fikrlash to‘g‘risida taqdimotlar hamda treninglar bo‘lib o‘tdi. Jumladan, NKMK bosh direktorining maʼnaviy-maʼrifiy yo‘nalish bo‘yicha maslahatchisi X.Raupov, Navoiy davlat konchilik instituti “Ijtimoiy-gumanitar fanlari” kafedrasi dotsenti O.Shamiyeva, Navoiy davlat pedagogika instituti “Psixologiya” kafedrasi katta o‘qituvchisi R.Ashrapov, NKMK maʼnaviyat va maʼrifat markazi yetakchi mutaxassisi J.Shuhratovlar yoshlar yetakchilariga kerakli bilim va ko‘nikmalarni olishlari uchun qiziqarli maʼruza va taqdimotlar qilishdi.

– Bugungi kunda biz yoshlarga cheksiz imkoniyatlar yaratib berilayapti. Islohotlar ko‘lami shunchalik kengki, nazarimda ularni bir yoki bir nechta deb sanab bo‘lmaydi. 2021 yil yoshlar hayotining ajralmas bir bo‘lagiga aylanishiga ishonaman. Yaratilayotgan sharoitlar va imkoniyatlar yoshlarni harakatga undamoqda. Endi ulardan unumli foydalanib, yuksak natijalarga erishishimiz kerak xolos. Ana shundagina amalga oshirilayotgan islohotlar o‘z samarasini beradi, – deydi Navoiy mashinasozlik zavodi yoshlar boshlang‘ich tashkilot yetakchisi Bahodir Abdullayev.

Seminarning ikkinchi kunida yoshlar uchun kombinatning Navoiy mashinasozlik zavodiga ekskursiya va “NKMK tarixi” muzeyiga sayohat tashkil etildi. Shuningdek, Karmana tumanidagi Qosim Shayx majmuasiga ziyorat uyushtirildi.

NKMK Matbuot markazi.