Joriy yilda Navoiy kon-metallurgiya kombinatining 4-gidrometallurgiya zavodi foydalanishga topshirilganiga 15 yil to‘ldi. Mazkur zavodning Qo‘shrabot tumanidagi Zarkent qo‘rg‘onida barpo etilishi mamlakatimiz metallurgiya sanoati tarixida muhim voqea bo‘lib, mahalliy aholi uchun ko‘plab yangi ish o‘rinlari yaratildi.

O‘tgan 15 yil qisqa muddat bo‘lsada, zavod uchun bu rivojlanishning muhim bosqichi bo‘ldi. O‘tgan vaqt mobaynida zavodda ishlab chiqarishni raqamlashtirish, innovatsion va ratsionalizatorlik takliflarini joriy etish evaziga yillik maʼdan qayta ishlash quvvati 1,8 mln. tonnadan 2 mln. tonnaga oshirildi. 2025-yilning to‘qqiz oyida zavodda 1,5 mln. tonnadan ortiq maʼdan qayta ishlandi.

- Zavodimiz barpo etilgunga qadar “Zarmitan” maydonidagi konlardan qazib olingan maʼdan 80 kilometr uzoqda joylashgan “Marjonbuloq” oltin ajratish sexiga qayta ishlash uchun tashilgan. Bu, qo‘shimcha vaqt va mehnat talab qilar, katta sarf-xarajatlarni keltirib chiqarar edi. Talab va ehtiyojdan kelib chiqib, hududda zamonaviy zavod bunyod etilishi Navoiy kon-metallurgiya kombinati uchun ham, Janubiy kon boshqarmasi uchun ham yangi imkoniyatlar yaratdi. Korxonada gravitatsiya-sorbsiya texnologiyasi asosida maʼdandan qimmatbaho metall ajratib olinmoqda. Zavodimiz hozirgi kunda maʼdandan oltin ajratib olish darajasi (koeffitsiyenti) bo‘yicha kombinatning qayta ishlash korxonalari orasida yetakchi o‘rinda turadi, - deydi 4-gidrometallurgiya zavodi direktori Nusratillo Hayitov.

Bugungi kunda korxonada qariyb 500 nafar ishchi-xodim mehnat qilmoqda. Zavod jamoasi asosan yoshlardan tarkib topgan. Ular rahbarlik lavozimlari, mutaxassis va muhandis-texnolog vazifalarida ishlab, o‘zlariga bildirilgan ishonchni oqlamoqda.

“NKMK” AJ Matbuot xizmati