Oldin xabar berganimizdek, Navoiy shahrida “Yangi O‘zbekiston yoshlari, birlashaylik!” shiori ostida yoshlar festivali o‘tkazilayapti. 17 iyun, festivalning ikkinchi kuni “Farhod” madaniyat saroyidagi “NKMK tarixi” muzeyida “Zamonamiz qahramonlari” loyihasi doirasida O‘zbekiston Qahramonlari va yoshlar uchrashuvi bo‘lib o‘tdi.

00180

Jonajon yurtimizda fidoiy insonlar mehnati o‘z rag‘batini topib, davlatimizning yuksak mukofotlari bilan taqdirlanayotgani, ular orasida O‘zbekiston Qahramoni degan yuksak unvonga sazovor bo‘lganlar borligi, ayni paytda shunday yuksak unvonga sazovor bo‘lgan uch nafar zamonamiz qahramonlari Navoiy kon-metallurgiya kombinatida mehnat qilayotgani qalbimizga cheksiz faxru iftixor bag‘ishlaydi.

Uchrashuvda Navoiy kon-metallurgiya kombinati bosh direktori, O‘zbekiston Qahramoni Quvondiq Sanaqulov hamda Markaziy kon boshqarmasi O‘quv markazi ustasi, O‘zbekiston Qahramoni Farhod Soyibovlar ishtirok etib, yoshlarga hayot yo‘li haqida gapirib berishdi. Shuningdek, Shimoliy kon boshqarmasi kon texnikalarini taʼmirlash sexi ustasi, O‘zbekiston Qahramoni Anatoliy Panin ham videorolik orqali yosh avlod vakillariga dil izhorini yo‘lladi. Albatta, bu insonlar bosib o‘tgan sharafli yo‘l barchamiz uchun ibratlidir.

00181

Uchrashuv qiziqarli savol-javoblarga boy bo‘ldi. Yoshlarga kombinat tashabbusi bilan nashr etilgan kitoblar sovg‘a qilindi.

NKMK Matbuot markazi.