Kombinat tomonidan Zomin tog‘lari bag‘rida “NKMK” sanatoriysi barpo etilganiga hali ko‘p bo‘lgani yo‘q. Shundan buyon zamonaviy sihatgoh dam oluvchilar bilan gavjum. Ushbu sog‘lomlashtirish va dam olish maskani bugungi yozning issiq kunlarida yanada gavjumlashgan. Ayni paytda bir guruh hamkasblarimiz va taniqli ijodkorlar ushbu ko‘rkam maskanda mazmunli hordiq chiqarishmoqda.

0001313

Darhaqiqat, to‘rt gektarlik maydonda joylashgan zamonaviy va ko‘rkam sihatgohda dam oluvchilar uchun barcha shart-sharoitlar muhayyo. Konsert dasturlari va ijodiy kechalarga mo‘ljallangan amfiteatr, kutubxona, oshxona, majlislar zali, turli sport maydonchalari va boshqa qulayliklar ular xizmatida. Ayniqsa, bog‘dagi soyabonlar, gultuvaklarga ekilgan manzarali daraxtlar va gullar, kichik meʼmoriy shakllar va o‘ziga xos landshaft yechimi, go‘zal tabiat manzaralari, tog‘ning shifobaxsh havosi, tibbiy muoalajalar barchaga ruhiy tetiklik bag‘ishlasa, yozuvchi-shoirlarga yangidan-yangi mavzularni yaratishga ilhom berishi tabiiy.

000132

Konchi va ijodkorlarning bo‘sh vaqtlarini mazmunli o‘tkazish uchun tashkil etilayotgan bir-biridan qiziqarli maʼnaviy-maʼrifiy tadbirlar, ijodkorlarning konchilar bilan uchrashuvlari, sheʼrxonlik kechalari, mushoiralar dam oluvchilarga shukuhli onlarni ulashmoqda. Yaqinda NKMK Maʼnaviyat va maʼrifat markazi, O‘zbekiston Yozuvchilar uyushmasi va sanatoriy maʼmuriyati hamkorlikda navbatdagi ijodiy kecha tashkil etildi. Ushbu tadbirda O‘zbekiston xalq shoirlari Mahmud Toir, Enaxon Siddiqova, Qoraqalpog‘iston xalq shoiri Kenesbay Karimov, shoir va yozuvchilardan Farmon Toshev, Nodir Jonuzoq, Munavvara Usmonova, Xosiyat Rustamova, Umida Abduazimova, Abduqayum Yo‘ldoshev, Isajon Sulton, adabiyotshunos olimlar Ahmadjon Meliboyev, Qozoqboy Yo‘ldoshev, Nurboy Jabborovlar ishtirok etishdi.

000133

El tanigan yozuvchi-shoirlarning ona-Vatan, mustaqillik, yuksak insoniy fazilatlar, ezgulik, mehr-muhabbat va boshqa dolzarb mavzularni keng tarannum etgan yangi ijod namunalari, sheʼrlar, teran mushohadalar, kuy-qo‘shiqlar purviqor tog‘lar bag‘rida o‘zgacha aks-sado berib, barchaga zavq ulashdi. Muxtasar aytganda, bu uchrashuv ishlab chiqarish fidoiylari va ijod ahlining maqsadlari mushtarakligi hamda hamohangligining amaldagi ifodasi bo‘ldi.

NKMK Matbuot markazi.