30-sentabrda Toshkent shahrida “O‘zbekiston: iqtisodiy islohotlar yutuqlari va ularning istiqbollari” mavzusida O‘zbekiston Iqtisodiy Forumining ikkinchi kuni o‘tkazildi.

Mazkur Forumda O‘zbekiston hukumati, xalqaro biznes va moliyaviy hamjamiyatlar, xalqaro va mintaqaviy ko‘p tomonlama rivojlanish institutlari, yirik sanoat korxonalar, shu jumladan Navoiy kon-metallurgiya kombinati vakillari ham ishtirok etishdi.

O‘zbekiston Respublikasi Moliya vazirligi axborot xizmati eʼlon qilgan maʼlumotga ko‘ra, mazkur Forum dasturida davlat korxonalari va banklar transformasiyasi, xususiylashtirish, kapital bozorini rivojlantirish, davlat-xususiy sheriklik loyihalari hamda mintaqaviy iqtisodiy hamkorlik istiqbollari kabi mavzular qamrab olingan.

Forumning ikkinchi kuni kon-metallurgiya sohasida qo‘shimcha qiymatli ishlab chiqarishni rivojlantirishga bag‘ishlab o‘tkazilgan suhbatda NKMK bosh direktori Q.Sanaqulov qatnashdi. Shuningdek, Forum doirasida Navoiy kon-metallurgiya kombinati va Rossiyaning VTB Banki o‘rtasida hamkorlik kelishuvi imzolandi. Mazkur kelishuvga binoan, VTB Banki tomonidan NKMK Investitsiya dasturini moliyalashtirish maqsadida 5 yil muddatga 1 mlrd AQSH dollari miqdorida kredit ajratiladi.

NKMK Matbuot markazi.