2021-yil 21-oktabr kuni Navoiy kon-metallurgiya kombinati faxriysi, O‘zbekiston Qahramoni Anatoliy Nikolayevich Panin 72 yoshida vafot etdi.

Mehnat faoliyatini 1970-yilda Shimoliy kon boshqarmasi “Sharqiy” karyeri ekskavator mashinisti yordamchiligidan boshlab, 1977-1983-yillarda ekskavator mashinisti, 1983-2019-yillarda ekskavator mashinistlari brigadasi brigadiri vazifasida ishlagan.

Anatoliy Nikolayevich Panin ko‘p yillik mehnat faoliyati davomida kon-metallurgiya sohasida boy tajriba to‘plab, ulkan jamoada o‘z kasbining haqiqiy jonkuyari, ustoz-murabbiy sifatida hurmat-eʼtibor topdi. U Qizilqum sahrosini o‘zlashtirishga qo‘shgan munosib hissasi, ibratli fazilatlari, mehnatsevarligi, jonajon Vatanimizga cheksiz muhabbati va sadoqati bilan ko‘pmillatli xalqimizning qalbidan haqli ravishda chuqur joy olgan fidoiy inson edi. Har doim zimmasidagi masʼuliyatni chuqur his etib, tajribali ekskavatorchi sifatida ulkan kon texnikalarini yuqori unum bilan ishlashini taʼminlab keldi.

Anatoliy Nikolayevich yosh konchilarni tarbiyalash, o‘zi istiqomat qilgan Uchquduq tumanini iqtisodiy-ijtimoiy rivojlantirish, kon-metallurgiya sohasida yuqori iqtisodiy samaradorlikka erishish borasidagi ishlarda bevosita ishtirok etdi.

Zahmatkash inson Anatoliy Nikolayevich Panin doimo el-yurtning dardu tashvishlari bilan yashadi. Ayniqsa, ustoz-murabbiy sifatida uchquduqlik yoshlarni mehnatsevarlik va vatanparvarlik ruhida tarbiyalash, aholi o‘rtasida sportni ommalashtirish, yoshlarning bo‘sh vaqtlarini mazmunli tashkil etish yo‘lida chinakam fidoyilik ko‘rsatib, sidqidildan xizmat qildi.

Yurt oqsoqoli, xalq deputatlari Uchquduq tuman Kengashi deputati sifatida yurtimizda olib borilayotgan islohotlar jarayonlarida faol ishtirok etib, mustaqilligimizni mustahkamlash, aholini ijtimoiy himoya qilishga katta hissa qo‘shdi.

Anatoliy Nikolayevich Paninning davlatimiz va xalqimiz oldidagi ulkan xizmatlari munosib taqdirlanib, u 1995 yilda “O‘zbekiston Qahramoni” yuksak unvoni bilan mukofotlangan edi. Shuningdek, ko‘p yillik fidokorona mehnatlari, soha rivojiga qo‘shgan munosib hissasi uchun O‘zbekiston Respublikasi Mustaqilligining 1, 10, 20, 25 yillik esdalik nishonlari, “NKMK faxriysi” unvoni, uchala darajadagi “Konchilik shuhrati” ko‘krak nishonlari bilan taqdirlangan.

Mamlakatimiz kon-metallurgiya sohasining haqiqiy jonkuyarlaridan biri, yetuk murabbiy va fidoyi inson Anatoliy Nikolayevich Paninning yorqin xotirasi qalblarimizda hamisha saqlanib qoladi.

NKMK mehnat jamoasi.