So‘nggi yillarda Navoiy kon-metallurgiya kombinati tomonidan bunyod etilgan gidrometallurgiya zavodlarining aksariyati Qizilqum kengliklarida joylashgan. Xususan, kombinat mutaxassislari tomonidan barpo etilgan 7-gidrometallurgiya zavodi – texnogen chiqindilarni qayta ishlaydigan yirik sanoat majmuasidir.

Mazkur majmuadagi texnogen chiqindilarni qayta ishlash jarayoni maʼdanni qazib olish, texnologik maydalash, saralash va tashish uchun xarajatlarning yo‘qligi bilan ajralib turadi. Bu esa, o‘z navbatida, zavodda ishlab chiqariladigan mahsulot tannarxini sezilarli darajada pasaytirish imkonini berdi. 2023-yilda zavodda 15,8 mln. tonna texnogen chiqindi qayta ishlangan bo‘lsa, joriy yilda ushbu ko‘rsatkich 16 mln. tonnani tashkil etishi kutilmoqda.

“NKMK” AJda 2024-yilga mo‘ljallangan qurilishning manzilli ro‘yxatiga asosan kombinat mutaxassislari tomonidan 7-GMZning texnogen chiqindilarni qayta ishlash quvvatlarini kengaytirishga qaratilgan loyiha bo‘yicha qurilish ishlari olib borilmoqda. Jumladan, kelgusida zavod sexlarida o‘rnatiladigan tegirmonlar, quyultirgichlar va boshqa qurilmalarning poydevori barpo etilmoqda hamda kommunikatsiya tarmoqlarni montaj qilish ishlari bajarilmoqda.

7-gidrometallurgiya zavodi bosh muhandisi o‘rinbosari Olimjon Ahatov taʼkidlaganidek:

“Bugungi kunda zavodda yiliga 10 mln. tonna texnogen chiqindini qayta ishlash quvvatiga ega 4 ta yangi tegirmon barpo etilmoqda. Buning hisobiga zavodda tegirmonlar soni o‘ntaga yetkaziladi va yillik qayta ishlash hajmini 25 mln. tonnaga oshirish imkoni yaratiladi. Shuningdek, zavodning qator sexlarini kengaytirish ham rejalashtirilgan. Bu kabi bunyodkorlik ishlari mahsulot ishlab chiqarish hajmini oshirishga xizmat qilishi tabiiy.”

Taʼkidlash joizki, yangi tegirmonlar uchun zarur asbob-uskuna va ehtiyot qismlar mahaliylashtirilib, Navoiy mashinasozlik zavodi hamda Zarafshon taʼmirlash-mexanik zavodida tayyorlanyapti. Qurilish ishlari Zarafshon qurilish boshqarmasi tomonidan amalga oshirilmoqda.

“NKMK” AJ Matbuot xizmati.